ޗައިނާގެ ކުރީގެ ރައީސް ޖިއަން ޒިމިންގެ ހަނދާނުގައި ރާއްޖޭގައި ހުންނަ ޗައިނާގެ އެމްބަސީގައި ހުޅުވާފައިވާ ތައުޒިޔާގެ ދަފްތަރުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ސޮއިކުރައްވައިފިއެވެ.
ތައުޒިޔާގެ ދަފްތަރުގައި ރައީސް ސޯލިހު ލިޔުއްވި ބަޔާނުގައި، ޗައިނާގެ ކުރީގެ ރައީސް އަވަހާރަވުމުގެ ހިތާމައިގައި ޗައިނާގެ ސަރުކާރަށާއި ރައްޔިތުންނަށް ތައުޒިޔާ ވިދާޅުވެފައިވާ ކަމަށް ރައީސް އޮފީހުން ބުނެއެވެ.
އަދި ޗައިނާގެ ކުރީގެ ރައީސް ޖިއަން ޒިމިންގެ ޒައާމަތުގައި އެގައުމަށް ލިބިގެންދިޔަ ކުރިއެރުންތައް ވެސް އެމަނިކުފާނު ފާހަގަކުރެއްވާފައިވާ ކަމަށް ރައީސް އޮފީހުން ވަނީ ބުނެފައެވެ.
ރައީސް އޮފީހުން އިތުރަށް ބުނީ، އެމަނިކުފާނުގެ ޒައާމަތުގައި، ޗައިނާއިން ބައިނަލްއަގްވާމީ މައިދާނުގައި ހޯދާފައިވާ ކާމިޔާބީތަކަށް ވެސް ރައީސް ސޯލިހު ތައުރީފްކުރެއްވި ކަމަށެވެ.
ޗައިނާގެ ކުރީގެ ރައީސް ޖިއަން ޒިމިން އަވަހާރަވީ، މިދިޔަ ނޮވެމްބަރު މަހުގެ 30 ވަނަ ދުވަހުއެވެ.
އަވަހާރަވި އިރު އުމުރުފުޅަކީ، 96 އަހަރެވެ.
