އިންޑިއާ އަކީ، ހައްލު ހޯދައި ދިނުމުގެ ބައިވެރިއެއް ކަމަށާއި އދ ގެ ސެކިއުރިޓީ ކައުންސިލްގެ ރައީސް ކަމާއި ޖީ20 ގެ ރިޔާސަތު ބަލަހައްޓަން ތައްޔާރު ކަމަށް އިންޑިއާއިން ބުނެފިއެވެ.
އދ ގައި އިންނަވާ އިންޑިއާގެ ދާއިމީ މަންދޫބު ރުޗިރާ ކަމްބޯޖް ވިދާޅުވީ، އިންޑިއާއަކީ އިންސާނީ ވަސީލަތްތަކަށް އިސްކަން ދޭ އަދި އެ މަގަށް މަސައްކަތް ކުރާ ގައުމެއް ކަމަށާއި ޓޮޕް ޓޭބަލް (އިސް މޭޒު) އަށް ހައްލު ގެނެސްދެވޭނެ ކަމަށެވެ.
އިންޑިއާއަކީ އަބަދުވެސް ރިފޯމަށް ގޮވާލައި އެ މަގަށް މަސައްކަތް ކުރާ ގައުމެއް ކަމަށާއި އެހެން ކަމުން ސެކިއުރިޓީ ކައުންސިލްގެ ދާއިމީ ގޮނޑިއެއް މިހާެރު މުހިންމު ވާ ކަމަށެވެ.
އދ ގެ ސެކިއުރިޓީ ކައުންސިލްގައި މިހާރު ތިބެނީ ދާއިމީ 5 މެންބަރުންނާއި ކޮންމެ 2 އަހަރަކުން ބަދަލުވާ އިންތިހާބީ 10 މެންބަރުންނެވެ. އިންޑިއާ ހިމެނެނީ މި 10 މެންބަރުންގެ ތެރޭގައެވެ.
ކަމްބޯޖް ވިދާޅުވީ، އެގޮތުގައި ސެކިއުރިޓީ ކައުންސިލް ކުރިއަށް ދާތާ އެތައް ޒަމާނެއް ވެއްޖެ ކަމަށާއި އެހެން އޮތުމުން މައްސަލަތަކުގައި "ސައި" ވާ ކަމަށެވެ. އަދި މިހާރު ކައުންސިލް އޮތް ގޮތުން، މުޅި ދުނިޔޭގެ ބައިވެރިވުން ތަމްސީލު ނުކުރެވޭ ކަމަށާއި ސެކިއުރިޓީ ކައުންސިލަކީ އެންމެން ޝާވިލްވާ ނުވަތަ ތަމްސީލު ކުރެވޭ ތަނަކަށް ވާން ޖެހޭ ކަމަށެވެ.
އޭނާ އިތުރަށް ވިދާޅުވީ، ބަލިމަޑުކަމެއްގެ ހާލަތުގައާއި ހައިހޫނުކަމުގެ ހާލަތުގައި އިންޑިއާ އަކީ ބަރޯސާ ކުރެވޭނެ ބައިނަލްއަގުވާމީ ބައިވެރިއެއްކަން ދުނިޔެއަށް ދައްކާފައި ވާ ކަމަށެވެ. އަދި އެ ކައުންސިލްގެ މެންބަރު ކަމުގައި ފާއިތުވި 2 އަހަރު ދުވަހު އިންޑިއާ އިން ވަނީ ދިމާވި ހުރިހާ ގޮންޖެހުމެއްގައި "ގޮނޑު ވިއްދައި ދީފައި" ކަމަށާއި ތަފާތު މައްސަލަތަކުގައި އެއް އަޑަކުން އެއް ރޫހެއްގައި މަސައްކަތް ކުރުމަށް މިހާރު އިތުރު ހަރުފަތަކަށް އިންޑިއާ ދާން ޖެހޭ ކަމަށާއި އެއީ އެ ކައުންސިލްގެ ދާއިމީ މެންބަރުކަން ކަމުގައި އޭނާ ވިދާޅުވެއެވެ.
އިންޑިއާއިން ސެކިއުރިޓީ ކައުންސިލްގެ ދާއިމީ ގޮނޑިއަކަށް މަސައްކަތް ކުރާ އިރު، އެ މަގުގައި އިންޑިއާއަށް ތާއީދު ކުރާ އަދި ކެމްޕެއިން ކުރާ ގައުމުތައްވެސް އެބަތިއްބެއެވެ. އެ ގައުމުތަކާއި އަދި އެހެން ބައެއް ގައުމުތަކުން ސެކިއުރިޓީ ކައުންސިލް ރިފޯމް ކުރަން ގޮވާލި ނަމަވެސް މިހާރު އެ ކައުންސިލްގެ ދާއިމީ ގޮނޑިތަކުގައި ތިބި ގައުމުތަކުން އިސްލާހުގެ މަގުގައި އެންމެ އިންޗި އެއްވެސް ކުރިއަށް ކުރިއަށް ނުޖެހޭ ކަމަށް ކަމްބޯޖް ވިދާޅުވެއެވެ.
ސެކިއުރިޓީ ކައުންސިލްގެ ދާއިމީ 5 މެންބަރުންނަކީ، ޗައިނާ، ފްރާންސް، ރަޝިއާ، އިނގިރޭސިވިލާތް އަދި އެމެރިކާއެވެ.
މިދިޔަ ބުރާސްފަތި ދުވަހު އިންޑިއާ ވަނީ ސެކިއުރިޓީ ކައުންސިލްގެ ކުރިއަށް އޮތް ދެ އަހަރުގެ ރައީސް ކަމަށް ހޮވިފައެވެ. މިއީ އިންޑިއާއިން އެ ކައުންސިލްގެ ރައީސްކަން ކުރާ ދެވަނަ ފަހަރުވެސް މެއެވެ.
އިންޑިއާ އަކީ މި ފެށުނު ޑެސެމްބަރުން ފެށިގެން 1 އަހަރުގެ މުއްދަތަށް ޖީ20 ގައުމުތަކުގެ ރިޔާސަތުވެސް ބަލަހައްޓާ ގައުމެވެ. ދުނިޔޭގެ އެންމެ މުއްސަނދި 20 އިގްތިސޯދުގެ މި ދައުރުގެ ބައްދަލުވުންތައް ބާއްވަން ހަމަޖައްސާފައި ވަނީވެސް އިންޑިއާ ގައެވެ. މި ބައްދަލުވުންތަކުގައި ބައިވެރިވުމަށް ގެސްޓުންގެ ގޮތުގައި ބައެއް ގައުމުތަކަށް ދައުވަތު ދީފައި ވާ އިރު ރާއްޖެއަށް ދައުވަތެއް ނުލިބެއެވެ. ނަމަވެސް އިންޑިއާއިން ޖީ20 ގެ ރިޔާސަތާ ހަވާލުވުމުން ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އިންޑިއާގެ ބޮޑުވަޒީރާއި އެގައުމުގެ ރައްޔިތުންނަށް މަރުހަބާ ވިދާޅުވެފައެވެ. އަދި މިވަގުތު ހައްސާސް މައްސަލަތަކަށް ހައްލު ހޯދުމުގައި އިންޑިއާއިން މުހިންމު ދައުރެއް އަދާކުރާނެ ކަމުގެ ފުރިހަމަ ޔަގީންކަން އޮތް ކަމަށްވެސް ރައީސް ސޯލިހު ވަނި ވިދާޅުވެފައެވެ.
