އިންޑިއާގެ ބޮޑުވަޒީރު ނަރެންދްރަ މޯދީގެ އުފަން ޝަހަރު އަދި ގާތްގަނޑަކަށް 13 އަހަރު ވާންދެން ޗީފް މިނިސްޓަރަކަށް ހުންނެވި ގުޖުރާތުގައި މިހާރު ކުރިއަށް ދާ ސަރަހައްދީ ވޯޓުން ބީޖޭޕީ ކާމިޔާބު ކުރާނެ ކަމަށް ބުނަން ފަށައިފިއެވެ.
އެނަލިސްޓުން ބުނާ ގޮތުގައި، މި އިންތިހާބަކީ، ރާހޫލް ގާނދީ ތަމްސީކުރައްވާ އިދިކޮޅު ކޮންގްރެސް ޕާޓީއަށް އިމްތިހާނަކަށް ވާނެ ކަމަށާއި ފަސޭހަ ކަމާއެކު ބީޖޭޕީން އިންތިހާބު ކާމިޔާބު ކުރާނެ ކަމަށެވެ.
ގުޖުރާތަކީ ބީޖޭޕީގެ އިތުރުން، ބީޖޭޕީގެ ކޯލިޝަން ޕާޓުނަރު އާމްއާދަމީ ޕާޓީއަށް ސަޕޯޓު ބޮޑު ޝަހަރެކެވެ. އިދިކޮޅު ކޮންގްރެސްގެ މާ ބޮޑު ހަރަކާތްތަކެއް ކުރިއަށް ނުގެންދާތާ އެތައް ޒަމާނެއް ވެފައި ވުމުން، ކޮންްރެސް އަށް އެ ޝަހަރު އަތުލުމަކީ ނާދިރު ކަމެކެވެ.
މުރާސިލުން ބުނާ ގޮތުގައި، ގުޖުރާތު ވޯޓަކީ، އަންނަ 2024 ވަނަ އަހަރު އެގައުމުގައި އޮންނަ މައި އިންތިހާބަށް މުހިންމު ވޯޓެކެވެ. ގުޖުރާތުގެ ސިޔާސީ މަސްރަހު އޮތް ގޮތުން، އެންމެ ބޮޑު ޕާޓީއަކީ ބީޖޭޕީ ނަމަވެސް، އާމްއާދަމީ ޕާޓީގެ ސަޕޯޓް ކުޑައެއް ނޫނެވެ. ނަމަވެސް ގުޖުރާތުގެ ރައްޔިތުންގެ ގިނަ ކަންބޮޑުވުންތަކެއް ހުރި އިރު، އެކަންކަމަށް ހައްލެއް ނުލިބި 2024 ގެ އިންތިހާބަށް ދާނަމަ، ވޯޓު ފުރޮޅޭނެ ކަމަށް ބުނެއެވެ.
ގުޖުރާތުގެ ރައްޔިތުންގެ އެންމެ ބޮޑު ކަންބޮޑުވުމަކީ، ވެރިކަން ކުރާ ބީޖޭޕީގެ މެޖޯރިޓީ އޮވެ އެ ޝަހަރުގައި ވަޒީފާ ނެތުމާއި ކޮރަޕްޝަން އިންތިހާއަށް ފުޅާވެފައި އޮތުމެވެ.
ގުޖުރާތު ވޯޓުގެ ދެވަނަ ބުރު ހޯމަ ދުވަހު ފަށާ އިރު ރަސްމީ ނަތީޖާ އިއުލާން ކުރާނީ ޑެސެމްބަރު 8 ގައެވެ. މި ވޯޓާ ދިމާކޮށް ދާދި ފަހުން މޯދީ ގުޖުރާތަށް ވަޑައިގަން ހުންނަވަނިކޮށް އެ ޝަހަރުގެ މޯބީއިން އަހުމަދުއާބާދަށް ކޯރެއް ހުރަސްކޮށް ދާން އޮންނަ ބްރިޖް ކަނޑައިގެެން ވެއްޓި އެތައް ބަޔަކު މަރުވި ހާދިސާއެއް ވަނީ ހިނގާފައެވެ. އަދި މި ދަނޑިވަޅަކީ، އިދިކޮޅު ލީޑަރު ރާހޫލް ގާނދީ އިސްވެ ހުންނަވާ ޖަންމޫ އެންޑް ކަޝްމީރަށް ނިންމާ ގޮތަށް 150 ދުވަހަށް ދެމިގެން ދާ 3750 ކިލޯމީޓަރުގެ ހިނގާލުމެއްވެސް ކުރިއަށް ގެންދަވާ ވަގުތެކެވެ. މި ހިނގާލުމުގައި ރާހޫލް މިވަގުތު ހުންނެވީ މަދްޔަ ޕްރަދޭޝްގައެވެ.
