ކ. މާފުށީގައި ޓްރެއިނިން ފުރިހަމަ ކުރަމުން ދިޔަ އަންހެން އޮފިސަރަކު ގެނބިގެން ފަރުވާ ދެމުން ދަނިކޮށް މަރުވެއްޖެއެވެ.
'ދަ ޕްރެސް' އަށް މައުލޫމާތު ދެމުން ކަރެކްޝަން އިން ވަނީ އެ ތަނުގައި ޓްރެއިނިން ހދަމުން ދިޔަ އަންހެން އޮފިސަރެއް މަރުވެފައިވާ ކަަން ކަށަވަރު ކޮށް ދީފައެވެ. އަންހެން އޮފިސަރެއް މަރުވުމުން އެކަން ބަލަމުންދާ ކަމަށާއި އެ އަށް ފަހު އެ ކަމުގެ ތަފްސީލް ހާމަ ކުރާނެ ކަމަށް ކަރެކްޝަން އިން ބުނެއެވެ. ނަމަވެސް އޭނާގެ މަރާ ގުޅޭ ގޮތުން އިތުުރު ތަފްސީލެއް ކަރެކްޝަން އިން ނުދެއެވެ.
މިކަމާ ގުޅިގެން ފުލުހުން ބުނީ، މާފުށީގައި ޓްރެއިނިން ހަދަމުން ދިޔަ ކަރެކްޝަންސްގެ މުވައްޒަފަކު ގެނބިގެން މާފުށީ ސިއްހީ މަރުކަޒަށް ގެންގޮސްފައިވާ ކަމުގެ މައުލޫމާތު މިއަދު ހެނދުނު 11:15 ހާ އިރު ލިބިފައިވާ ކަމަށެވެ. އިތުރު ފަރުވާ އަށް އޭނާ މާލެއަށް ގެނެސް އައިޖީއެމްއެޗްގައި ފަރުވާ ދީފައިވާ ކަަމަށާއި އޭނާ މަރުވީ ފަރުވާ ދެމުން ދަނިކޮށް ކަމަށް ފުލުހުން ބުނެއެވެ.
މި ހާދިސާ އިތުރަށް ބަލައި ތަހުގީގު ކުރަމުންދާ ކަމަށް ފުލުހުން ބުނެއެެވެ.
މީގެ ކުރިން ވެސް ސިފައިންނާއި ފުލުހުންގެ ތެރެއިން ވެސް ޓްރެއިނިންގައި ތިއްބާ އޮފިސަރުން މަރުވެފައިވާ ހާދިސާތައް ވަނީ ފެންމަތިވެފައެވެ.
