ރަޝިއާއިން ޔޫކްރައިން އަށް އަރާ ފެށި ހަނގުރާމަ އާ ގުޅިގެން ރަޝިއާއަށް ދަތިކުރުމުގެ ފިޔަވަޅު އަޅާފައި ވުމުގެ އިތުރުން ރަޝިއާއާ ގުޅުން ބަދަލިކޮށް ހަކަތަ ގަންނަ ފަރާތްތަކަށް ބިރު ދައްކާ ހުޅަނގާއި އެމެރިކާއިން ދަނީ ފިޔަވަޅު އަޅަމުންނެވެ.
ދުނިޔޭގެ އިގްތިސޯދު ކޮންޓްރޯލް ކުރާ އެންމެ މުއްސަނދި 7 ގައުމުންވެސް ރަޝިއާއަށް ދަތިކުރުމުގެ ފިޔަވަޅުތައް އަޅާ މިދަނޑިވަޅުގައި ރަޝިއާއިން ތެޔިގަންނަން ބޭނުންވާ ކަމަށް ޕާކިސްތާނުން ބުނެފިއެވެ. އެ ގައުމުގެ ފިނޭންސް މިނިސްޓަރު އިޝްހާގް ދާރު ވިދާޅުވީ، ދަތިކުރުމުގެ ފިޔަވަޅު އަޅާފައި އޮއްވާވެސް އިންޑިއާއިންވެސް ތެޔޮގަންނަނީ ކަމަށާއި ޕާކިސްތާނަށްވެސް އެފުރުސަތު އޮންނަން ވާނެ ކަމަށެވެ.
ޕާކިސްތާނުން މި ރާގުގައި ވާހަކަ ދެއްކި އިރު، ނިމިދިޔަ ޖޫން މަހުން ފެށިގެން ކުރަމުން ދިޔަ މޫސުމީ ވިއްސާރައިގައި އެގައުމުގައި ފެންބޮޑުވެ ގައުމު އިގްތިސޯދީ ކާރިސާއަކަށް ވަނީ ވެއްޓިފައެވެ. އެއާއެކު މޫޑީސް އިން އެގައުމުގެ ކުރެޑިޓް ރޭޓިންވެސް ދަށްކޮށްފައި ވާ މިދަނޑިވަޅުގައި ދަރަނި 30 ބިލިއަން ޑޮލަރު (462 ބިލިއަން ރުފިޔާ) އަށް އަރާފައި ވާ އިރު، ގައުމުގެ ކަރަންޓް އެކައުންޓް ޑެފިސިޓް ވެ (އެކްސްޕޯޓް ކުރާ މިންވަރަށް ވުރެ އިމްޕޯޓް މަތިވުން) އިންފްލޭޝަން 20 ޕަސެންޓަށް ވަނީ އަރާފައެވެ.
ނަމަވެސް ޕާކިސްތާނުގެ ފިނޭންސް މިނިސްޓަރު ވިދާޅުވަނީ، އިގްތިސޯދު ހަމައަކަށް އެޅުވޭނެ ކަމަށާއި އެކަން ކުރުމަށް ޕެރިސް ކްލަބުގައި އޮތް ދަރަނި ރީސްޓްރަކްޗާ ކުރުމަށްވެސް އެދިފައި ވުމުގެ އިތުރުން އައިއެމްއެފްގެ އެހީއަށްވެސް އެދިފައިވާނެ ކަމަށެވެ.
ޕެރިސް ކްލަބަކީ، ގައުމު ތަކުގެ މާލީ ހާލަތު ތަނގަޅު ކުރުމަށް ދަރަންޏަށް ފައިސާ ދޫކުރާ އެތައް 100 ގައުމެއް ބައިވެރިވާ ޖަމާއަތެކެވެ. މި ޖަމާއަތުގައި ދާއިމީ 22 މެންބަރުން ތިބޭ އިރު އޭގެތެރޭގައި އެމެރިކާ، ފްރާންސް، އިނގިރޭސިވިލާތް އަދި ޖަޕާން ފަދަ މުއަސަނދި ގައުމުތައް ހިމެނެއެވެ. އެ ކްލަބުން މިހާތަނަށް 100 އަށް ވުރެ ގިނަ ގައުމަށް 611 ބިލިއަން ޑޮލަރުގެ ކްރެޑިޓް ވަނީ ދީފައެވެ. އެ ޖަމާއަތުން ޕާކިސްތާނުން ނަގާފައިވާ ފައިސާއަށް ދައްކަން ޖެހޭ ދަރަނީގެ އަދަދަކީ 10 ބިލިއަން ޑޮލަރެވެ.
މީގެ ކުރިންވެސް 3 ފަހަރަކު ދަރަނި ރީސްޓްރަކްޗާ ކޮށްފައި ވާ އިރު އަލުން ރީސްޓްރަކްޗާ ކޮންދިނުމާ އެކު ގައުމު ޑިފޯލްޓް (ބަނގުރޫޓު) ނުވެ ހިފެހެއްޓޭނެ ކަމަށާއި އޭގެ އިތުރުން ސަރަހައްދީ އެކި ގައުމުތަކުގައި އޮތް ދަރަންޏާއެކު ޖުމްލަ 27 ބިލިއަންގެ ދަރަނި ރީސްޓްރަކްޗާ ކުރަން އެދޭނެ ކަމަށްވެސް އޭނާ ވިދާޅުވެއެވެ.
ވޭތުވެ ދިޔަ 5 އަހަރު ތެރޭގައި 5 ފަހަރަށް ޕާކިސްތާނުގެ ފިނޭންސް މިނިސްޓަރު ބަދަލު ކޮށްފައި ވާ އިރު، މިއީ އިޝަހާގް ދާރު ފައިނޭންސް މިނިސްޓަރުކަން ކުރައްވާ 4 ވަނަ ފަހަރެވެ.
