އެއް ނަންބަރު ފާލަން ކައިރިއަށް ވެއްޓިފައި އޮތް 10،000 އަށް ވުރެ ގިނަ ރުފިޔާގެ ވެރިފަރާތް ހޯދަން ފުލުހުން އިއުލާން ކޮށްފިއެވެ.
ފުލުހުން ބުނީ މިދިޔަ ހުކުރު ދުވަހުގެ ދަންވަރު 12 ގެ ފަހުން އާންމުންގެ މީހަކު، ހުދުކުލައިގެ ސިޓީ އުރައެއްގެ ތެރޭގައި ހުރި އެ ފައިސާތައް ހޮވައިގެން ގެނެސް ފުލުހުންނާ ހަވާލު ކޮށްފައިވާ ކަމަށެވެ.
އެ ފައިސާތަކުގެ ވެރިފަރާތް ހޯދަން ކުރި މަސައްކަތް އަދި ކާމިޔާބުނުވާ ކަމަށް ވެސް ފުލުހުން ބުންޏެވެ.
އެހެންކަމުން، އެ ފައިސާތަކުގެ ވެރިފަރާތުން ފުލުހުންގެ ގަލޮޅު ސްޓޭޝަނަށް ހާޒިރުވެ ފައިސާ އާ ހަވާލުވުމަށާއި، އިތުރު މައުލޫމާތު ބޭނުން ނަމަ ފުލުހުންގެ ނަންބަރު 9631696 އާ ގުޅުމަށް ވެސް ފުލުހުން އެދިފައި ވެއެވެ.
އާންމު ތަންތަނުން ހޮވައިގެން އެފަދައިން ގެންދާ ތަކެތީގެ ވެރިފަރާތްތައް ހޯދުމަށް ފުލުހުން އިއުލާން ކުރެއެވެ. އެގޮތަށް ވެރިފަރާތް ހޯދަން އިއުލާން ކުރާ ތަކެތީގެ ތެރޭގައި އަގުބޮޑު ތަކެތި ވެސް ހިމެނެއެވެ.
