މާލެ ގެއެއްގެ ތެރޭގައި ބަނގުރާ ކެއްކި މައްސަލައަކާ ގުޅިގެން މީހަކު ހައްޔަރު ކޮށްފިއެވެ.
ހެންވޭރު ރޯޝަނީ މަގުގައި ހުރި ގެއަކުން ދުން އަރާކަމަށް އެމްއެންޑީއެފްއާއި ފުލުހުން އެގެއަށް ވަދެ، ބެލިބެލުމުން އެގޭ ތެރެއިން ދުން އަރަމުންދިޔައީ ބަނގުރާ ކައްކަމުން ދާތީކަމަށް ފުލުހުން ވަނީ ބުނެފައެވެ.
ފުލުހުން ބުނީ އެމައްސަލައާ ގުޅިގެން ހައްޔަރުކޮށްފައިވަނީ 34 އަހަރުގެ ބިދޭސީއެއް ކަމަށެވެ. އެމީހާ ހައްޔަރުކޮށްފައިވަނީ އެގޭ ތެރެއިން ކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ތަހުގީގު ކުރަމުންދާ ކަމަށް ފުލުހުން ބުނެއެވެ.
ހެންވޭރު ރޯށަނީ މަގުގައި ހުރި ގެއަކުން ދުން އަރާކަމަށް ބުނެ ފުލުހުންނަށް ރިޕޯޓުކޮށްފައިވަނީ 03:12 ހާއިރުއެވެ.
ބަނގުރާ ކެއްކުމަށް ބޭނުން ކުރާ ގިނަ ސާމާނުތަކެއް އެގޭތެރެއިން ފެނިފައިވާ ކަމަށް ވެސް ފުލުހުން ބުނެއެވެ.
