ބޯހިމެނުމުގެ މައުލޫމާތު ނުދޭ ފަރާތްތަކުން މި މަހުގެ 18 ވަނަ ދުވަހުގެ ނިޔަލަށް އެ މައުލޫމާތު ހިއްސާ ކުރުމަށް އަންގައިފިއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން ބުނީ، ބޯހިމެނުމުގެ މައުލޫމާތު ނުނެގިވާ ތަންތަން ފާހަގަ ކުރުމަށް މިހާތަނަށް ކުރެވުނު މަސައްކަތުން މާލެ ސަރަހައްދުގައި ތަޅުލާފައި ހުރި ތަންތަނުގެ ތެރޭން 41 ޕަސެންޓް ތަނުން ވަނީ މައުލޫމާތު ލިބިފައި ކަމަށެވެ. އަދި ބޯހިމެނިފައިނު ވާކަން މި ބިއުރޯއަށް އަންގަމުން ގެންދާ ފަރާތްތަކުގެ މައުލޫމާތު އެއް ކުރުމުގެ މަސައްކަތް ދަނީ ކުރަމުން ކަމަށާއި މި މަހުގެ 18 ވާ ދުވަހުގެ ނިޔަލަށް ބޯހިމެނުމުގެ މަސައްކަތް ނިންމާލުމަށް އަމާޒުކޮށް ބިއުރޯގެ މުވައްޒަފުން މަސައްކަތް ކުރަމުންދާ ކަމަށް އެ ފަރާތުން ބުނެއެވެ.
ބޯހިމެނުން ފުރިހަމަ ވާނީ ހުރިހާ ފަރުދުން ހިމެނިގެން ކަމުން ބޯހިމެނުމުގައި ކޮންމެ ފަރުދަކު ވެސް ހިމެނުނު ކަން ޔަގީން ކުރުމަށް އެމްބީއެސް އިން ބުނެއެވެ. ބޯހިމެނުމަށް މައުލޫމާތު ދިނުމަކީ ދިވެހިރާއްޖޭގެ ތަފާސްހިސާބުގެ ގާނޫނުގެ ދަށުން އެންމެހައި ފަރާތްތަކަށް ލާޒިމު ކުރާ ކަމެކެވެ.
އެހެންކަމުން އަދި މިހާތަނަށް ބޯހިމެނިފައިނުވާ ގޭބިސީތަކުން އެ ބިއުރޯގެ ހޮޓްލައިން 1423 ނުވަތަ 3008400 އަށް ގުޅައި ނުވަތަ ވެބްސައިޓްގައިވާ ފޯމު ފުރިހަމަ ކޮށް އެކަން އެ ބިއުރޯއަށް އެންގުމަށް ވަނީ އެދިފައެވެ އަދި މީހުން ދިރިނޫޅޭ ތަންތަނާއި، ނިދުމަށް ބޭނުން ނުކުރާ ތަންތަނާއި، ހުސްކޮށް ހުރި ތަންތަނުގެ ވެރިފަރާތްތަކުން އެކަން ފާހަގަކޮށް އެންގުމަށް ވެސް ވަނީ އެދިފައެވެ.
މީގެ އިތުރުން ބޯހިމެނުމުގެ މަސައްކަތުގައި އާންމުންގެ ފަރާތުން ލިބޭ އެއްބާރުލުން ފާޙަގަ ކުރާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނެއެވެ.
ބޯހިމެނުމުގެ މަސައްކަތް މާލެ ސަރަހައްދުގައި އަދިވެސް ނިންމާލެވިފައި ނުވާތީ ވަގުތީ ނަތީޖާ އިއުލާންކުރާ ދުވަސް މިހާރު ވަނީ ވަކި މުއްދަތެއް ނެތް ގޮތަށް ފަސްކޮށްފައެވެ. މީގެ ކުރިން ވަގުތީ ނަތީޖާ އިއުލާންކުރުމަށް ނިންމާފައި އޮތީ މިމަހުގެ ހަވަނަ ދުވަހުއެވެ. ބޯހިމެނުމުގެ ދާއިމީ ނަތީޖާ ކުރިން ވެސް ނިންމާފައިވާ ގޮތަށް މިމަހުގެ 20 ވަނަ ދުވަހު އިއުލާންކުރާނެ ކަމަށް އެމްބީއެސް އިން ވަނީ ބުނެފައެވެ.
ދެކަންފަތާއި ދެލޯ ހުޅުވާ! ބޯހިމެނުމުގެނަމުގައި ރައްޔިތުންގެ ޓެކްސް ފައިސާއިން ބޮޑު އުޖޫރައެއްނަގައި މަޢުލޫމާތު ހޯދުމަށް ރައްޔިތުންނާއި ހިސާބަށް އައުމުގެ ތެދުވެރިކަމެއްނުވެސް ހައްދަވާ! އަހަރެމެންވެސް މިއީ ދިރިތިބި ބޮޑު ދެ ޢާއިލާއެއް މާލެ ސަރަހައްދުގައި ދިރިއުޅޭ، އަހަރެމެން ދިރިއުޅޭ ހިސާބަކަށް ނާދޭ މަޢުލޫމާތު ހޯދާކަށް! އަހަރެމެން ކަހަލަ ކިތައްޢާއިލާވާނެބާ ވުޖޫދުން ނަގާލާފައި؟ މިވާހަކަ ދައްކަމުން މިދަނީ. އެމީހުންނަށް އުޖޫރަދީފައި، އަހަރެންތަ ޖެހެނީ އެމީހުންގެ ފައިބުޑަށް ދާން މަޢުލޫމާތުދޭން؟ މިއީ "އޮންލައިންގެ" ..........!