ދިވެހިރާއްޖެއިން އިންޑިއާއަށާއި، މެލޭޝިޔާއަށް ކަނޑައަޅުއްވާ ސަފީރުކަމަށް ދެ ފަރާތެއް އައްޔަނުކުރައްވާ މަގާމުގެ ފަތްކޮޅު ދެއްވައިފިއެވެ.
ރައީސް އޮފީހުން ބުނީ، ދިވެހިރާއްޖެއިން ރިޕަބްލިކް އޮފް އިންޑިއާއަށް ކަނޑައަޅުއްވާފައި ހުންނަވާ ސަފީރުކަމުގެ މަގާމަށް އައްޔަންކުރެއްވީ ހ. ޖެހޭވައި، އިބްރާހީމް ޝަހީބު ކަމަށެވެ. އަދި މެލޭޝިޔާއަށް ކަނޑައަޅުއްވާފާ ހުންނަވާ ސަފީރުކަމުގެ މަގާމަށް އައްޔަނުކުރެއްވީ ހ. މާލޭތިލަ، އަލީ ހުސައިންދީދީ ކަމަށް ރައީސް އޮފީހުން ބުނެއެވެ.
އެ ދެ ފަރާތައް މަގާމުގެ ފަތްކޮޅު ދެއްވީ، މިކަމަށްޓަކައި މިއަދު މެންދުރުކުރީ ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައެވެ.
ދިވެހިރާއްޖެއިން، އިންޑިއާއަށް ކަނޑައެޅުއްވި ސަފީރުކަމުގައިވާ، އިބްރާހީމް ޝަހީބަކީ ސިންގަޕޫރުގެ ލީ ކުއާން ޔޫ ސްކޫލް އޮފް ޕަބްލިކް ޕޮލިސީއިން މާސްޓަރ އިން ޕަބްލިކް އެޑްމިނިސްޓްރޭޝަން ހާސިލްކުރައްވައިގެން ހުންނެވި ފަރާތެކެވެ. ޝަހީބް، މީގެ ކުރިން ފުރުއްވާފައިވާ މުހިންމު ބައެއް މަޤާމްތަކުގެ ތެރޭގައި، މިނިސްޓްރީ އޮފް ފޮރިން އެފެއާޒްގެ ޗީފް ޕްރޮޓޮކޯލްގެ މަގާމާއި، އެ މިނިސްޓްރީގެ އެޑިޝަނަލް ސެކްރެޓަރީގެ މަގާމު ހިމެނެއެވެ.
ދިވެހިރާއްޖެއިން، މެލޭޝިޔާއަށް ކަނޑައެޅުއްވި ސަފީރުކަމުގައިވާ، އަލީ ހުސައިންދީދީއަކީ އިނގިރޭސިވިލާތުގެ ލޯބޮރޯ ޔުނިވާސިޓީ އޮފް ޓެކްނޮލޮޖީ އިން ޕީޖީ ޑިޕްލޮމާ މާސްޓާސް ޕްރޮގްރާމް، ޓްރާންސްޕޯޓް މެނޭޖްމަންޓް އެންޑް ޕްލޭނިން ހާސިލްކުރައްވައިގެން ހުންނެވި ފަރާތެކެވެ.
އަލީ ހުސައިންދީދީ މީގެ ކުރިން ފުރުއްވާފައިވާ، މުހިންމު ބައެއް މަގާމްތަކުގެ ތެރޭގައި، ޑިޕާޓްމަންޓް އޮފް އިމިގްރޭޝަންގެ ކޮންޓްރޯލާގެ މަގާމާއި، މާލެ ސިޓީގެ ކައުންސިލްގެ ރައީސްގެ މަގާމާއި، މޯލްޑިވްސް އެއާޕޯޓްސް ކޮމްޕެނީގެ ޗީފް އެގްޒެކެޓިވް އޮފިސަރުގެ މަގާމު ހިމެނެއެވެ.
މީގެ އިތުރުން އަލީ ހުސައިންދީދީއަކީ މީގެ ކުރިން ވެސް ދިވެހިރާއްޖެއިން، ސްރީލަންކާއަށާއި، ބެލްޖިއަމް ފަދަ ގައުމުތަކަށް ކަނޑައެޅުއްވި ސަފީރުކަމުގެ މަގާމު ފުރުއްވާފައިވާ ފަރާތެކެވެ. އަލީ ހުސައިންދީދީ ދިވެހިރާއްޖެއިން، މެލޭޝިޔާއަށް ކަނޑައެޅުއްވި ސަފީރުކަމުގެ މަގާމަށް ޢައްޔަނުކުރެއްވުމުގެ ކުރިން ހުންނެވީ ދަ މޯލްޑިވްސް ކޯޕަރޭޝަންގެ ރައީސްގެ މަގާމުގައެވެ.
