ޒަމާނުއްސުރެ މާލޭގެ މަގުތަކަށް ކިޔާ ނަންތައް ފާރުގައި ހަރުކޮށްފައި ހުންނަ ހުރުމުގެ ބަދަލުގައި، މަގުތަކަށް ކިޔާ ނަންތައް ފަސޭހައިން ފެންނަ ގޮތަކަށް ހަރުކުރުމަށް ސިޓީ ކައުންސިލުން ނިންމާފައިވާ ކަމަށް، މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މީޑިއާ އާ ބައްދަލުކުރައްވާ މުއިއްޒު ވިދާޅުވީ، މާލޭގައި އަމިއްލަ ތަންތަން ހެދުމުގެ ތެރޭގައި ފާރުތައް ތަޅާލައި މަސައްކަތްކުރަން ޖެހުމުގެ ސަބަބުން މަގުތަކުގެ ނަންތައް ގެއްލިއްޖެ ކަމަށެވެ.
"ކުރީގަ ހުންނާނެ މާލޭގެ ހުރިހާ މަގެއްގަ ނަން އެނގެން. އެހެންނަމަވެސް އޭރުގަ ހުންނަނީ ފާރުގަ ނަން ޖަހާފަ. އެ ފާރުތައް މިހާރު ތަޅާލާ ކޮންމެ މީހެއްގެ ވެސް އަމިއްލަ ގެ ހެދުމާއި، އެކަންކަމުގެ ތެރޭގަ މަގުތަކުގެ ނަންތައް ގެއްލިއްޖެ." މުއިއްޒު ވިދާޅުވިއެވެ.
މޭޔަރު ވިދާޅުވީ، އެ މަޝްރޫއުގެ ދަށުން މާލޭގެ މަގުތައް އެއްކޮށް ސާވޭ ކުރުމަށް ފަހު، މާލޭގެ މަގުތަކުގައި ނަން ބޯޑު ހަރުކުރަން ޖެހޭ ގޮތުގެ ތަފްސީލު ވެސް ހަދައި ނިމިފައިވާ ކަމަށެވެ. އަދި އެ މަޝްރޫއަށް އިންވެސްޓުކުރާނެ ފަރާތެއް ނުވަތަ ސްޕޮންސަރެއް ހޯދުމަށް ފާސްކޮށްފައިވާ ކަމަށާއި، މި ހަފްތާގައި އިއުލާނުކުރާނެ ކަމަށް ވެސް ވިދާޅުވިއެވެ.
އެ މަޝްރޫއަށް ބޮޑު ހަރަދެއް ހިނގާނެ ކަމަށް ލަފާކުރައްވައި މޭޔަރު ވިދާޅުވި ގޮތުގައި، އެ މަޝްރޫއުގެ ސަބަބުން އިންވެސްޓަރުންނަށް އެކްސްޕޯޝާ ލިބި، ސްޕޮންސާކޮށް އިސްތިހާރުކުރުމަށް މަގުފަހިވެގެން ދާނެއެވެ.
ނަމަވެސް އޭނާ ވިދާޅުވީ އިޝްތިހާރު ޖަހަން ދޫކުރާނީ ކައުންސިލުން ކަނޑައަޅާފައިވާ މިންގަނޑުތަކަށް ފެތޭ ގޮތަށް ކަމަށެވެ.
"މިހާރު އަޅުގަނޑުމެން ބޭނުމެއް ނޫން މާލެތެރެއަކީ އެއްވެސް ހަމައެއް އުސޫލެއް ނެތް ގޮތަކަށް އިސްތިހާރު ހުންނަ ތަނަކަށް [ހަދާކަށް]." މުއިއްޒު ވިދާޅުވިއެވެ.
