މާލެ ސަރަހައްދުގައި ބޯހިމެނުމުގެ މައުލޫމާތު ނުލިބޭ 900 އަށް ވުރެ ގިނަ ތަން އެބަހުރި ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނެފިއެވެ.
އެމްބީއެސް އިން މިއަދު ނެރުނު ބަޔާނެއްގައި ބުނީ، މާލެ ސަރަހައްދުން މައުލޫމާތު ނުލިބޭ 900 އަށް ވުރެ ގިނަ ތަންތަން އަދިވެސް އެބަހުރި ކަމަށާއި ބައެއް ތަންތަނުން މައުލޫމާތު ނުލިބިވަނީ ތަޅުލާފައި ހުރުމުންނާއި، މައުލޫމާތު ދެވޭ ވަރުގެ މީހަކާ ދިމާނުވުމާއި، ރަށުން ބޭރުގައިވުމާއި، އެނިއުމަރޭޓަރުން ދީފައިވާ އެޕޮއިންޓްމަންޓަށް އެމީހުންނަށް ނުދެވުމުގެ ސަބަބުން ކަމަށެވެ.
މައުލޫމާތު ނުލިބޭ ތަންތަނުން މީހުންނާ ގުޅޭގޮތް ވޭތޯ މަސައްކަތް ކުރަމުންދާ ކަމަށް އެމްބީއެސްއިން ބުނެއެވެ.
އެމްބީއެސް އިން ވަނީ ބޯހިމަނާފައި ނުވާ މީހުންނާއި ތަންތަނުން ބިއުރޯގެ ހޮޓްލައިން ނަންބަރު 1423 ނުވަތަ 3008400 ނަންބަރަށް ގުޅުމުން މައުލޫމާތު ނެގުމުގެ އިންތިޒާމު ހަމަޖައްސާނެ ކަމަށް ބުނެފައެވެ.
ބޯހިމެނުމުގެ މަސައްކަތް މާލެ ސަރަހައްދުގައި އަދިވެސް ނިންމާލެވިފައި ނުވާތީ ވަގުތީ ނަތީޖާ އިއުލާންކުރާ ދުވަސް މިހާރު ވަނީ ވަކި މުއްދަތެއް ނެތް ގޮތަށް ފަސްކޮށްފައެވެ.
މީގެ ކުރިން ވަގުތީ ނަތީޖާ އިއުލާންކުރުމަށް ނިންމާފައި އޮތީ މިމަހުގެ ހަވަނަ ދުވަހުއެވެ.
ބޯހިމެނުމުގެ ދާއިމީ ނަތީޖާ ކުރިން ވެސް ނިންމާފައިވާ ގޮތަށް މިމަހުގެ 20 ވަނަ ދުވަހު އިއުލާންކުރާނެ ކަމަށް އެމްބީއެސް އިން ވަނީ ބުނެފައެވެ.
