އިނގިރޭސި ޝާހީ އާއިލާ އަށް ނިސްބަތްކޮށް ނެޓްފްލިކްސް އިން ގެނެސްދޭ މަޝްހޫރު ސީރީޒް "ދަ ކްރައުން"ގެ ފަސް ވަނަ ސީޒަން އަންނަ ނޮވެމްބަރު މަހު ސްޓްރީމްކުރާނެ ކަން އިއުލާންކޮށްފިއެވެ.
މި ފަހަރުގެ ސީޒަނުގައި ރާނީ އެލިޒަބަތުގެ ރޯލުން ފެނިގެންގެންދާނީ އިލެމްޑާ ސްޓޯންޓަން އެވެ. އަދި ޕްރިންސް ފިލިޕްގެ ރޯލު އެކްޓަރު ޖޮނަތަން ޕްރައިސް ކުޅެފައިވާ އިރު ޕްރިންސް ޗާލްސްގެ ރޯލު ކުޅުނީ ޑޮމިނިކް ވެސްޓެވެ. އަދި ޑަނާޔާގެ ރޯލު ކުޅެނީ އެލިޒަބަތު ޑެބީކީ އެވެ. ރާނީ އެލިޒަބެތުގެ ހަޔާތުގެ މައްޗަށްް ބިނާކޮށް ގެނެސްދޭ މި ސީރީޒަކީ ޕީޓާ މޯގަން ޕްރޮޑިއުސްކޮށް އުފައްދާފައިވާ ސީރީޒެކެވެ.
މި މަހުގެ އަށް ވަނަ ދުވަހު ރާނީ އެލިޒަބަތު އުމުރުފުޅުން 96 އަހަރުގައި އަވަހާރަވުމާއެކު "ދަ ކްރައުން" ގެ ހަވަނަ ސީޒަންގެ ޝޫޓިން ވަނީ ވަގުތީގޮތުން މެދުކަނޑާލާފައެވެ. ބައެއް ރިޕޯޓްތަކުން ހާމަކުރިގޮތުގައި ރާނީ އަވަހަރާވުމާއި ގުޅިގެން މި ސީރީޒްގެ ހަވަނަ ސީޒަން ދެން ނުގެންނާނެއެވެ. އެހެންކަމަށްވާނަމަ ސީޒަން ފަހެއް ވެގެންދާނީ ތާރީހީ ސީރީޒްގެ ފަހު ސީޒަނަށެވެ. މީޑިއާ ރިޕޯޓްތައް މިހެން ބުނި ނަމަވެސް ނެޓްފްލިކްސް އިން ވަކި ގޮތެއް ނިންމުމަށްފަހު އަދި އިއުލާންކޮށްފައެއްނުވެއެވެ.
"ދަ ކްރައުން" ގެ ފަސް ވަނަ ސީޒަން ނޮވެމްބަރު މަހުގެ ނުވަ ވަނަ ދުވަހު ދައްކަން ފަށާއިރު މި ސީޒަނުގައި ހިމެނޭނީ ޖުމްލަ 10 އެޕިސޯޑެވެ. މި ސީރީޒްގެ އެންމެ ފުރަތަމަ ގެނެސްދިނީ 2016 ގައެވެ.
ރާނީ އެލިޒަބަތު އަވަހާރަވީ ސިއްހީ ހާލުކޮޅު ގޯސްވެ ޑޮކްޓަރުންގެ ހާއްސަ ބެލުމުގެ ދަށުގައި ސްކޮޓްލޭންޑްގައި ހުންނަ ބެލްމޯރަލް ގަނޑުވަރުގައި އޮންނަވަނިކޮށެވެ. ރާނީ އެލިޒަބަތަކީ އެކަމަނާގެ ބައްޕާފުޅު ކިންގް ޖޯޖު 1952 ވަނަ އަހަރު އަވަހާރަ ވުމުން ރަނިކަމާ ހަވާލުވެވަޑައިގެން އެންމެ ދިގު މުއްދަތަކަށް ރަނިކަން ކުރެއްވުމުގެ ޝަރަފު އޮތް ރާނީއެވެ. އެކަމަނާ ރަނިކަމުގައި ހުންނަވާތާ މިހާރު 70 އަހަރު ވީއެވެ.
