ގެއްލިގެން ހޯދަމުންދާ އުމުރުން 27 އަހަރުގެ މުހައްމަދު އަޒުހާން އަދިވެސް ނުފެންނަ ކަމަށް ފުލުހުން ބުނެފިއެވެ.
ފުލުހުން މިއަދު ބުނީ، ގެއްލުނު އަޒުހާން މިހާތަނަށް އަދި ފެނިފައި ނުވާ ކަމަށާއި އަޒުހާން ހޯދުމުގެ މަސައްކަތް ކުރަމުން އަންނަ ކަމަށެވެ. މިގޮތުން މާލެ އާއި ހުޅުމާލޭގެ އެކި ސަރަހައްދުތައް ބަލަމުންދާ ކަމަށް ފުލުހުން ވަނީ ބުނެފައެވެ.
އަޒުހާން ގެއްލިފައިވަނީ ހުޅުމާލެ ފޭސް 2 އިން ކަމަށާއި ގެއްލިގެން ރިޕޯޓްކޮށްފައިވަނީ މި މަހުގެ 19 ވަނަ ދުވަހުގެ ރޭ ގާތްގަނޑަކަށް 7 ޖަހާއިރު ކަމަށް ފުލުހުން ބުނެއެވެ.
އަޒުހާން އެންމެފަހު ފެނުނުއިރު ލައިގެން ހުރީ މާޖެހި ޕީޗް ކުލައިގެ އަތްކުރު ގަމީހެއް ކަމަށް ވެސް ފުލުހުން މީގެ ކުރިން ވަނީ ބުނެފައެވެ.
ފުލުހުން ވަނީ އަޒުހާނާ ބެހޭ އެއްވެސް މައުލޫމާތެއް އެނގިއްޖެނަމަ ހުޅުމާލެ ފޭސް 2ގެ ޕޮލިސް ސްޓޭޝަން ނަންބަރު 9393351 އަށް ގުޅާ އެކަން އަނގަން އެދިފައެވެ.
