ކުރިން ރާއްޖޭގައި ހިންގިފައި ނުވާފަދަ އެތައް މަޝްރޫއުތަކެއް މިހާރު ހިނގަމުންދާއިރު، އެދާއިރާތަކުން ތަމްރީންވެފައިވާ ދިވެހި ޒުވާނުން މިހާރު ބޭނުންވެފައިވާ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބު ރައީސް އެފަދައިން ވިދާޅުވީ ވިލާކޮލެޖްގެ ކިއުއައި ކެމްޕަހުގައި ރޭ ބޭއްވި އެ ކޮލެޖްގެ " ސްޓުޑެންޓްސް އެޗީވްމަންޓް އެވޯޑްސް 2022" ހަފްލާ ޝަރަވެރިކޮށްދެއްވައި ދެއްކެވި ވާހަކަދައްކަވަމުންނެވެ.
ދެވޭ ތައުލީމާ ތަމްރީނުގެ ފެންވަރު އިތުރަށް ރަނގަޅު ކުރުމަށް މިހާރު މަސައްކަތް ކުރަންޖެހިފައިވާ ކަމަށާއި އަދި ކުރިން ރާއްޖޭގައި ހިންގިފައި ނުވާފަދަ އެތައް މަޝްރޫއުތަކެއް މިހާރު ހިނގަމުންދާއިރު އެދާއިރާތަކުން ތަމްރީންވެފައިވާ ދިވެހި ޒުވާނުން މިހާރު ބޭނުންވެފައިވާ ކަމަށް ނައިބު ރައީސް ވިދާޅުވިއެވެ. އަދި އެންމެ މުހިއްމު ދާއިރާތަކުން މީހުން ބިނާކުރުމަށް މަތީ ތައުލީމް ފޯރުކޮށްދޭ މުއައްސަސާތަކާއި ސަރުކާރާއި އަދި ކުންފުނިތައް ގުޅިގެން މަސައްކަތް ކުރެއްވުމުގެ މުހިއްމުކަން ނައިބު ރައީސް ވަނީ ފާހަގަކުރައްވާފައެވެ.
ނައިބު ރައީސް ވަނީ ސިއްހީ ހިދުމަތްތަކާއި މަތީ ތައުލީމު ފަދަ ހިދުމަތްތައް ފުޅާކޮށް ފޯރުކޮށްދިނުމަށްޓަކައި އަމިއްލަ ފަރާތްތަކުން ކުރައްވާ މަސައްކަތްތައް ފަސޭހަކޮށްދެއްވުމަށް ސަރުކާރަށް ކޮށްދެއްވެން އޮތް ހުރިހާކަމެއް ކޮށްދެއްވާނެކަމުގެ ޔަގީންކަން ދެއްވާފައެވެ. އަދި ރާއްޖޭގައި އަމިއްލަ ފަރާތްތަކުން އެންމެ ފުރަތަމަ ހިދުމަތްތައް ދޭންފެށީ ދަތި އުނދަގޫތަކާއި ގޮންޖެހުންތަކާއި އެކުގައިކަން ފާހަގަކުރައްވާ ނައިބު ރައީސް ވިދާޅުވީ ފާއިތުވި 15 އަހަރުގެ ތެރޭގައި ވިލާކޮލެޖުން މަތީ ތައުލީމު ފޯރުކޮށްދިނުމަށް ކުރަމުން އައި މަސައްކަތްތަކަށް ޝުކުރުއަދާކުރައްވާފައެވެ.
ރައީސް އޮފީހުން ބުނީ އެ ހަފްލާގައި ވިލާކޮލެޖުން ދެމުން އަންނަ "ގާސިމް އިބްރާހިމް އެވޯޑް ފޯ އެކްސަލެންސް" ލިބުނު 11 ދަރިވަރުންނަށް އެވޯޑު ހަވާލުކޮށްދެއްވީ ނައިބު ރައީސް ކަމަށެވެ.
