މާލެ އާއި ހުޅުމާލެ ސަރަހައްދުގައި ބޯހިމެނުމުގެ މުއްދަތު އިތުރުކޮށްފިއެވެ.
މީގެ ކުރިން ބޯހިމެނުމުގެ ލިސްޓިންގެ މަސައްކަތްތައް ކުރިއަށް ގެންދިއުމަށް ހަމަޖެހިފައި އޮތީ ސެޕްޓެންބަރު މަހުގެ 13 އިން 14 ގެ ނިޔަލަށެވެ. އަދި ބޯހިމެނުމުގެ ތަފްސީލް މައުލޫމާތު ނެގުމުގެ މަސައްކަތްތައް ކުރިއަށް ގެންދިއުމަށް ހަމަޖެހިފައި ވަނީ ސެޕްޓެންބަރު 17 އިން 25 ގެ ނިޔަލަށެވެ.
ނަމަވެސް އެމުއްދަތު އިތުރުކޮށްފައި ވާއިރު މިހާރު ބޯހިމެނުމުގެ މުއްދަތު އިތުރުކޮށްފައި ވަނީ މި މަހުގެ 27ގެ ނިޔަލަށެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން މިއަދު ނެރުނު ބަޔާނެއްގައި ބުނީ، މާލެ އާއި ހުޅުމާލެ ސަރަހައްދުގެ ގޭބިސީތަކާއި ވިޔަފާރިތަކާއި ގުޅޭ މަޢުލޫމާތު އެއްކޮށް އަދި ނުނިމޭ ކަމަށެވެ. އެގޮތަށް ދިމާވީ މި ދެ ސަރަހައްދުގައި އެނިއުމަރޭޓަރުންގެ ގޮތުގައި މަސައްކަތްކުރާނެ މީހުން އެކަށީގެންވާ ވަރަށް ނުލިބުމުން ކަމަށް އެމްބީއެސް އިން ބުނެއެވެ.
އެހެން ކަމުން އެ ދެ ސަރަހައްދުގައި ލިސްޓިންގެ މަސައްކަތް ހޮނިހިރު ދުވަހު ވެސް ކުރިއަށްގެންދަން ނިންމާފައިވާ ކަމަށާއި އަދި ތަފްސީލް މައުލޫމާތު ނެގުމުގެ މުއްދަތު 27 އާ ހަމައަށް އިތުރު ކޮށްފައިވާ ކަމަށް އެމްބީއެސް ވަނީ ބުނެފައެވެ.
މިފަހަރުގެ ބޯހިމެނުމުގެ އަމަލީ މަސައްކަތުގައި 4000 އަށް ވުރެ ގިނަ ފަރާތްތަކުން ބައިވެރިވެއެވެ.
ބޯހިމެނުމުގެ މަސައްކަތުގައި ބައިވެރިވާ މީހުންނަށް ކޮންމެ ދުވަހަކަށް 500 ރުފިޔާގެ ގެ އެލަވެންސެއް ދޭން ނިންމާފައިވާއިރު އޭގެ އިތުރަށް 10 ރުފިޔާ ގެ އެލަވެންސެއް ވެސް ދިނުމަށް ވަނީ ނިންމާފައެވެ.
