މަސްދަރު ހާމަކުރުމުގެ ބާރު ހައިކޯޓަށް ލިބޭ ގޮތަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް އެޑިޓާސް ގިލްޑުން ބިލެއް އެކުލަވާލައިފިއެވެ.
އެމްޖޭއޭ އާއި އެޑިޓާސް ގިލްޑުން ވަނީ ހެއްކާ ބެހޭ ބިލުގެ މަސްދަރު ހާމަކުރުމުގެ މާއްދާއަށް ގެންނަން ބޭނުންވާ އިސްލާހުތައް ހިމަނައި ބިލެއް ޑްރާފުޓުކޮށް، އެ ޑްރާފްޓަށް ނޫސްވެރިންނާއި އާންމުންގެ ހިޔާލު ހޯދުމަށް ހުޅުވާލާފައެވެ.
ޑްރާފްޓްގައި މަސްދަރު ހާމަކުރަން އެންގިދާނެ ކަމަށް ބަޔާންކޮށްފައިވާ ކުށްތައް:
- މީހެއްގެ ހަށިގަނޑަށް ބޮޑު އަނިޔާއެއް ދިނުން
- ކުށް ކުރާ މީހާ ފިޔަވައި އެހެން މީހެއްގެ ފުރާނައަށް ނުރައްކަލެއް ކުރިމަތިވުން
- ގަދަކަމުން މީހަކު ފޮރުވުން ނުވަތަ ރަހީނުކުރުން
- މުދަލަށް ބޮޑެތި ގެއްލުން ދިނުން
- ފަސިންޖަރުން ނުވަތަ މުދާ އުފުލާ އުޅަނދެއް ހައިޖެކްކުރުން
- އާންމުންގެ ސިއްހަތަށް ނުވަތަ ސަލާމަތަށް ނުރައްކާވާ ފަދަ ހާލަތެއް ކުރިމަތިވުން
- މުހިންމު އުމްރާނީ ވަސީލަތްތަކަށް ބޮޑު ގެއްލުމެއް ދިނުން
- އަސާސީ ހިދުމަތް މެދުކަނޑުވާލުން
މަސްދަރު ހާމަކުރުމަށް އެދި ހުށަހަޅާ މައްސަލަތަކުގައި ކޯޓުން ކަށަވަރު ކުރަންޖެހޭނެ ކަންކަން ޑްރާފްޓުގައި ބަޔާންކޮށްފައި ވާއިރު އޭގެ ތެރޭގައި ކޮންމެހެން މަސްދަރު ހާމަ ކުރަން ޖެހޭތޯ ބެލުމާއި، މަސްދަރު ހާމަ ކުރުމަކާ ނުލާ ވެސް ތަހުގީގީ އެހެން ވަސީލަތްތައް ބޭނުންކޮށްގެން ކަމުގެ ހަގީގަތް ހޯދޭނެތޯ ބެލުން ހިމެނެއެވެ.
މީގެ އިތުރުން މަސްދަރު ހާމަކޮށްފި ނަމަ ގާނޫނުން ކަށަވަރުކޮށްދީފައި ވާ ނޫސްވެރިކަމާއި ހިޔާލު ފާޅުކުރުމުގެ މިނިވަންކަމަށް ކުރާނެ ނޭދެވޭ އަސަރު ބެލުން އަދި މަސްދަރު ހާމަ ނުކޮށްފި ނަމަ ނުކުންނާނެ ނޭދެވޭ ނަތީޖާ ބެލުން ވެސް އޭގެ ތެރޭގައި ހިމެނެއެވެ.
އެ ޑްރާފްޓަށް ހިޔާލު ހުށަހެޅުމުގެ ސުންގަޑިއަކީ އަންނަ ސެޕްޓެމްބަރު މަހުގެ ދެވަނަ ދުވަހެވެ.
