އެއްޖިންސުން ގުޅުން ހިންގި މައްސަލައިގައި ނޫސްވެރިޔާ އަބްދުﷲ ނަސީރު އިބްރާހިމް ހައްޔަރު ކޮށްފިއެވެ.
ރާއްޖެޓީވީގައި ކުރިން މަސައްކަތް ކުރި ނޫސްވެރިއެއް ކަމަށްވާ ނަސީރު ހައްޔަރު ކޮށްފައި ވަނީ މިއަދު މެންދުރުގެ ވަގުތެއްގައި ކަމަށް މައުލޫމާތު ލިބެއެވެ.
ނަސީރުގެ ވީޑިއޯ ލީކުވެފައި ވަނީ ބަންގުލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާ އެކު ގިނަ ބަޔަކު އެއްޖިންސުން ގުޅުން ހިންގާ ވީޑިއޯތަކެއް ދައުރުވި ދުވަސްކޮޅުގައެވެ. ނަމަވެސް ނަސީރުގެ ވީޑިއޯއިން ފެންނަނީ އަލަމްގިރް އެއް ނޫނެވެ.
އެމައްސަލައާ ގުޅިގެން ކޯޓު އަމުރެއްގެ ދަށުން ނާޒިމް ސައްތާރު އާއި ނާޒިމް ސައްތާރުގެ އިތުރުން ރައްޔިތުން މަޖިލީހުގެ ކުރީގެ މެންބަރު ކާނަލް ނަޝީދާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރާ އަބްދުއްރަހްމާން ރަފީއު އިއްޔެ ވަނީ ހައްޔަރު ކޮށްފައެވެ.
މީގެ ތެރެއިން ނާޒިމް ސައްތާރުގެ ބަންދަށް މިއަދު ވަނީ 7 ދުވަސް ޖަހާފައެވެ.
މި މަހުގެ 13 ވަނަ ދުވަހު އަލަމްގިރް ހައްޔަރު ކޮށްފައި ވާއިރު އޭނާ ހައްޔަރު ކޮށްފައި ވަނީ ވީޑިއޯ ނަގާ ބްލެކްމެއިލް ކުރިކަމުގެ ތުހުމަތުގައެވެ.
