އެއްޖިންސުން ގުޅުން ހިންގި މައްސަލައިގައި ހައްޔަރުކުރި ރައްޔިތުން މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް އަބްދުއްސައްތާރުގެ ބަންދަށް 7 ދުވަސް ޖަހައިފިއެވެ.
ނާޒިމް ވެލިގަނޑު ރިސޯޓުގައި ހުއްނަވަނިކޮށް ހައްޔަރުކޮށްގެން ގެންދިޔައީ އއ. ރަސްދޫއަށެވެ. ރަސްދޫ މެޖިސްޓްރޭޓް ކޯޓުގައި މިއަދު މެންދުރު ފަހު 3ގައި ނާޒިމްގެ އަޑުއެހުމެއް ބާއްވާފައި ވާއިރު ކޯޓުން ވަނީ އޭނާ ބަންދުގައި ބަހައްޓައިގެން މައްސަލަ ތަހުގީގު ކުރުމަށް ހަތް ދުވަހުގެ މުއްދަތެއް ދީފައެވެ.
މި އަޑުއެހުން ކުރިއަށް ގެންގޮސްފައި ވަނީ ސިއްރު ކޮށްގެންނެވެ.
ނާޒިމް ހައްޔަރުކުރަން ކޯޓު އަމުރު ނެރުމާއެކު ރިސޯޓަކަށް ވަޑައިގެން ކަމުގެ އަޑުތައް ގަދަވި ނަމަވެސް ނާޒިމްގެ ގާނޫނީ ވަކީލު ވިދާޅުވީ ކޯޓު އަމުރު ނެރުނުއިރު ވެސް ނާޒިމް ހުންނެވީ ރިސޯޓުގައި ކަމަށެވެ.
ބަންގުލަދޭޝްގެ ރައްޔިތެއް ކަމަށްވާ އެމްޑީ އަލަމްގިރް އާ އެކު ގިނަ ބަޔަކު އެއްޖިންސުން ގުޅުން ހިންގާ ވީޑިއޯތަކެއް ދައުރުވެފައި ވާއިރު އެކަމާ ގުޅިގެން ކޯޓު އަމުރެއްގެ ދަށުން ނާޒިމް ސައްތާރުގެ އިތުރުން ރައްޔިތުން މަޖިލީހުގެ ކުރީގެ މެންބަރު ކާނަލް ނަޝީދާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރާ އަބްދުއްރަހްމާން ރަފީއު މިއަދު ވަނީ ހައްޔަރު ކޮށްފައެވެ.
އަދި މި މަހުގެ 13 ވަނަ ދުވަހު އަލަމްގިރް ހައްޔަރު ކޮށްފައި ވާއިރު އޭނާ ހައްޔަރު ކޮށްފައި ވަނީ ވީޑިއޯ ނަގާ ބްލެކްމެއިލް ކުރިކަމުގެ ތުހުމަތުގައެވެ.
