އެއްޖިންސުން ގުޅުން ހިންގި މައްސަލައިގައި ހައްޔަރުކުރި ރައްޔިތުން މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް އަބްދުއްސައްތާރުގެ އަޑުއެހުން ސިއްރުކޮށްފިއެވެ.
ނާޒިމް ވެލިގަނޑު ރިސޯޓުގައި ހުއްޓައި ހައްޔަރުކޮށްގެން ގެންދިޔައީ އއ. ރަސްދޫއަށެވެ. މިމައްސަލައިގެ ޝަރީއަތުގެ އަޑުއެހުން މިއަދު 3ގައި އޮތް އިރު މި އަޑުއެހުން ކުރިއަށް ގެންގޮސްފައި ވަނީ ސިއްރުކޮށްގެންނެވެ. މިއަޑުއެހުމަށް ނޫސްވެރިން ވެސް ވައްދާފައި ނުވާ ކަމަށް މައުލޫމާތު ލިބެއެވެ.
ނާޒިމް ހައްޔަރުކުރަން ކޯޓު އަމުރު ނެރުމާއެކު ރިސޯޓަކަށް ވަޑައިގެން ކަމުގެ އަޑުތައް ގަދަވި ނަމަވެސް ނާޒިމްގެ ގާނޫނީ ވަކީލު ވިދާޅުވީ ކޯޓު އަމުރު ނެރުނުއިރު ވެސް ނާޒިމް ހުންނެވީ ރިސޯޓުގައި ކަމަށެވެ.
ނާޒިމް ހައްޔަރުކުރުމާ ގުޅިގެން ނުރުހުން ފާޅުކުރައްވާ ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވީ ރައީސް އިބްރާޙިމް މުހައްމަދު ސޯލިހުގެ ސަރުކާރުން އެމަނިކުފާނުގެ ކޮއްކޯފުޅު ނާޒިމް، އެއްޖިންސުން ގުޅުން ހިންގުމުގެ ތުހުމަތުގައި ހައްޔަރު ކޮށްފި ކަމަށެވެ.
އަދި ނާޒިމް ހައްޔަރު ކޮށްފައި ވަނީ ޖިނާއީ އިޖުރާއަތްތަކާ ހިލާފަށް ކަމަށާ، އެއީ ކޯލިޝަންގައި ތިބި ހަރުކަށި ފިކުރުގެ މީހުން ހިތްހަމަޖައްސައި ދިނުމަށް ސިޔާސީ ގޮތުން ކުރި ކަމެއް ކަމަށެވެ. ވެރިކަމަށް އައުމަށް އެމްޑީޕީން އަދާލަތާއި ޖޭޕީ އާ އެކު ކޯލިޝަން ހެދިނަމަވެސް އެ ކޯލިޝަން އުވާލައި އެމްޑީޕީގެ އަމިއްލަ ވެރިކަމެއް ގާއިމު ކުރަން ނަޝީދު ގޮވާލައްވާ އިރުވެސް ކޯލިޝަން ދަމަހައްޓަވަނީ ރައީސް ސޯލިހެވެ.
ބަންގުލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާ އެކު ގިނަ ބަޔަކު އެއްޖިންސުން ގުޅުން ހިންގާ ވީޑިއޯތަކެއް ދައުރުވެފައި ވާއިރު އެކަމާ ގުޅިގެން ކޯޓު އަމުރެއްގެ ދަށުން ނާޒިމް ސައްތާރުގެ އިތުރުން ރައްޔިތުން މަޖިލީހުގެ ކުރީގެ މެންބަރު ކާނަލް ނަޝީދާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރާ އަބްދުއްރަހްމާން ރަފީއު މިއަދު ވަނީ ހައްޔަރު ކޮށްފައެވެ.
އަދި މި މަހުގެ 13 ވަނަ ދުވަހު އަލަމްގިރް ހައްޔަރު ކޮށްފައި ވާއިރު އޭނާ ހައްޔަރު ކޮށްފައި ވަނީ ވީޑިއޯ ނަގާ ބްލެކްމެއިލް ކުރިކަމުގެ ތުހުމަތުގައެވެ.
ރާއްޖެޓީވީގައި ކުރިން މަސައްކަތް ކުރި ނޫސްވެރިއެއް ކަމަށްވާ އަބްދުﷲ ނަސީރު އިބްރާހިމް ކަމަށް ތުހުމަތުކުރާ މީހަކު އެއްޖިންސުން ގުޅުން ހިންގާ ވީޑިއޯއެއް ވެސް މިފަހުން ލީކްވެ ދައުރުވި ނަމަވެސް އޭނާ އަދި ހައްރަޔެއް ނުކުރެއެވެ.
