"މާވެހި"ގެ ނަމުގައި މާލެ ސިޓީ ކައުންސިލުން ފޯރުކޮށްދޭ ގިނަ ހިދުމަތްތަކެއް އޮންލައިންކޮށް ލިބޭނެ ޕޯޓަލެއް އިފްތިތާހު ކޮށްފިއެވެ.
އެ ޕޯޓަލް ރޭ އިފްތިތާހު ކޮށްދެއްވާފައި ވަނީ، މާލޭގެ ރައްޔިތުންނާ ބައްދަލުކުރުމަށް ބޭއްވި ބައްދަލުވުމުގައި މޭޔަރު ޑރ. މުހައްމަދު މުއިއްޒެވެ.
އަންނަ މަހުގެ 3 ވަނަ ދުވަހުން ފެށިގެން ޕޯޓަލް މެދުވެރިކޮށް އޮންލައިންކޮށް ހިދުމަތްތައް ދޭން ފެށުމަށް ކައުންސިލުން ވަނީ ނިންމައިފައެވެ.
މާވެހި ޕޯޓަލުން ހިދުމަތް ހޯދުމަށް އެދޭ ނަމަ، ފުރަތަމަ ޖެހޭނީ އައިޑީކާޑު ނަންބަރު ޖަހައި ރަޖިސްޓްރީވެލާށެވެ. ޕޯޓަލް މެދުވެރިކޮށް ހިދުމަތް ހޯދުމަށް ދަތިވާ ވަގުތުތަކުގައި ބޭނުންވާ މައުލޫމާތު ހިއްސާކުރުމަށް އެ ޕޯޓަލްގައި ހެލްޕްޑެސްކުތައް ގާއިމްކޮށްފައިވެއެވެ.
އެ ޕޯޓަލް ފަރުމާކޮށްފައި ވަނީ ސިޓީ ކައުންސިލުން ދޭ ހިދުމަތްތަކުގެ އަޕްޑޭޓާއި ނޮޓިފިކޭޝަން ބަލައިލެވޭ ގޮތަށެވެ.
ކައުންސިލުން ބުނީ، އެ ޕޯޓަލް އިފްތިތާހުކުރުމަށް ފަހު، ކައުންސިލްގެ ހުއްދަތައް ލިބިގެން ދާނީ ޑިޖިޓަލްކޮށް ކަމަށާއި، އެ ހުއްދައިގެ ސައްހަކަން ކަށަވަރުކުރުމަށްޓަކައި، އޭގައިވާ ކިއުއާރު ކޯޑު ސްކޭންކޮށްލުމުން ސައްހަ ހުއްދައެއްކަން ދެނެގަނެވޭނެ ކަމަށެވެ.
މޭޔަރު ވިދާޅުވި ގޮތުގައި، ސިޓީ ކައުންސިލުން ފޯރުކޮށްދޭ ހިދުމަތްތަކުގެ ތެރެއިން 90 ޕަސެންޓު ހިދުމަތް އެ ޕޯޓަލުން ލިބިގެން ދާނެއެވެ. އޭގެ ތެރޭގައި ހިމެނޭ ބައެއް ހިދުމަތްތަކަކީ:
- އިމާރާތްކުރުމާ ބެހޭ ހިދުމަތް
- މަގު ބަންދުކުރުމުގެ ހުއްދަ
- ފައްތިޔާ އާއި ފަޅުގެ ހިދުމަތް
- މިސްކިތްތަކަށް އެހީތެރިވެވޭނެ ގޮތްތައް
- ބިމާ ބެހޭ ހިދުމަތް
- ކުއްޖަކު އުފަންވުމުން ބޭނުންވާ ހިދުމަތް
- ޕާކެއް ނުވަތަ މައިޒާނެއް ކުއްޔަށް ހިފުމުގެ ހުއްދަ
ގިނަ ހިދުމަތްތައް އޮންލައިންކޮށް ދިނުމަށް ނިންމައި ސިޓީ ކައުންސިލުން ރޭ ޕޯޓަލެއް އިފްތިތާހު ކޮށްފައި ވާއިރު، ކޮވިޑް-19 ގެ ދަނޑިވަޅުގައި ގިނަ އިދާރާތަކުން ހިދުމަތްތައް ދެމުން ގެންދިޔައީ އޮންލައިންކޮށެވެ. ކޮވިޑަށް ފަހު ބައެއް އިދާރާތަކުންނާއި އަމިއްލަ ތަންތަނުން ވަނީ އޮންލައިންކޮށް ދޭ ހިދުމަތްތައް ފުޅާކޮށްފައެވެ.
