މޯލްޑިވްސް އިމިގްރޭޝަންގެ ނަމުގައި ފޭކު ވެބް އެޑްރެހެއް ހިންގަމުންދާތީ އެކަމަށް ސަމާލުވުމަށް އިމިގްރޭޝަނުން އިލްތިމާސްކޮށްފިއެވެ.
އިމިގްރޭޝަނުން ބުނީ ހަގީގަތް އޮޅޭ ފަދަ ގޮތަކަށް ވެބް އެޑްރެހެއް ދައުރުވަމުންދާ ކަމަށް ފާހަގަކުރެވިފައިވާ ކަމަށެވެ.
އިމިގްރޭޝަނުން ވަނީ މި ވެބްސައިޓް ބޭނުންކޮށްގެން އިމިގްރޭޝަނާ ގުޅޭ އެއްވެސް ހިދުމަތެއް ހޯދުމަށް ލޮގްއިން ނުވުމަށް އެދިފައެވެ. އަދި އިމިގްރޭޝަންގެ ރަސްމީ ވެބްސައިޓު ހިންގަމުން އަންނަނީ އިމުގާ ގެ ނަމުގައި ކަމަށްވާއިރު އެ ޕޯޓަލް މެދުވެރިކޮށް ކޮންމެ ވަގުތަކު ވެސް އޮންލައިންކޮށް ޕާސްޕޯޓުގެ ހިދުމަތާއި އެހެނިހެން ހިދުމަތްތަކަށް އެދެވޭނެ ކަމަށް އިމިގްރޭޝަނުން މީގެ ކުރިން ވަނީ ބުނެފައެވެ.
ފޭކް ވެބް އެޑްރެހެއް ދައުރުވާ ކަމަށް އިމިގްރޭޝަނުން މިވަނީ ބޮޑު ޗުއްޓީ ދުވަސްވަރާ ދިމާވުމުން ގިނަ ބަޔަކަށް ރާއްޖެއިން ބޭރަށް ދިއުމަށް އިމިގްރޭޝަންގެ ހިދުމަތް ހޯދަމުންދާ ދަނޑިވަޅެއްގައެވެ.
އެގޮތުން އިމިގްރޭޝަނުން ހިދުމަތް ހޯދާ މީހުންގެ އަދަދު އިތުރުވެ، ދުވާލެއްގެ މައްޗަށް 800 ވަރަކަށް ޕާސްޕޯޓް އިމިގްރޭޝަނުން ހަދަމުން އަންނަ ކަމަށް ވަނީ ބުނެފައެވެ.
