ނުވަ މަސް ފަހުން، ދިވެހި ނޫސްވެރިންގެ ޖަމިއްޔާ، އެމްޖޭއޭގެ ހުސްވެފައިވާ ރައީސް ކަމަށް "ވަން އޮންލައިން" ނޫހުގެ މެނޭޖިން އެޑިޓަރު އަލީ ރިފްޝާން އިންތިހާބު ކޮށްފިއެވެ.
ސްޓެލްކޯގެ ޖަލްސާކުރާ މާލަމުގައި އިއްޔެ ހަވީރު ބޭއްވި އެމްޖޭއޭގެ އަހަރީ އާންމު ޖަލްސާގައި، އެ ޖަމިއްޔާގެ ރައީސެއް އިންތިހާބުކޮށްފައި ވަނީ އެ ޖަމިއްޔާގެ ކުރީގެ ރައީސް، "ދައުރު" ނޫހުގެ އެއް ސީނިއާ އެސޯސިއޭޓް އެޑިޓަރު މުހައްމަދު ހަމްދޫން މިދިޔަ އޮކްޓޯބަރު މަހު މަގާމުން އިސްތިއުފާ ދެއްވުމާ ގުޅިގެންނެވެ.
އެހެންކަމުން، އެމްޖޭއޭގެ ރައީސްކަމުގެ މަސްއޫލިއްޔަތު އަދާކުރައްވާފައި ވަނީ މިދިޔަ ދައުރުގައި އެ ޖަމިއްޔާގެ ނައިބު ރައީސެއްގެ ގޮތުގައި ހުންނެވި ރިފްޝާނެވެ.
އިއްޔެ ބޭއްވި އެމްޖޭއޭގެ އަހަރީ އާންމު ބައްދަލުވުމަށް ބަލާލާއިރު، އެ ބައްދަލުވުމުގައި އެންމެ ފުރަތަމަ ވަނީ މިދިޔަ ތިން އަހަރު ދުވަހުގެ އަހަރީ ރިޕޯޓު ފާސްކޮށްފައެވެ.
އެއަށްފަހު އޮތީ ރައީސާއި ނައިބު ރައީސް އިންތިހާބު ކުރުމެވެ. އެގޮތުން ރައީސް ކަމަށް ވާދަ ކުރެއްވީ ރިފްޝާން ކަމަށް ވާއިރު، އޭނާ އެ މަގާމަށް އިންތިހާބުވެ ވަޑައިގަތީ އިއްޔެގެ ބައްދަލުވުމަށް ހާޒިރުވި 24 މެންބަރުންގެ އިއްތިފާގުންނެވެ. އެހެންކަމުން ނައިބު ރައީސްކަމުގެ މަގާމް ހުސްވުމާ ގުޅިގެން، އެ މަގާމަށް ކުރިމަތިލައްވާފައި ވަނީ "ދުވަސް" ނޫހުގެ ފައުންޑަރު އަދި އެޑިޓަރު އަޒްމީ އަލީ އެކަންޏެވެ. އޭނާ ނައިބު ރައީސް ކަމަށް އިންތިހާބުވެވަޑައިގަތީ ހާޒިރުވި މެންބަރުންގެ ތެރެއިން 20 މެންބަރުންގެ އިއްތިފާގުންނެވެ.
އެހެންކަމުން، ރައީސް ރިފްޝާނާއި ނައިބު ރައީސް އަޒްމީ އަށް ފަހު މިހާރު މަގާމުތަކުގައި ތިއްބެވީ:
- ހިންގާ ސެކްރެޓަރީ: ދައުރު ނޫހުގެ ސީނިއާ އެސޯސިއޭޓް އެޑިޓަރު އަހްމަދު ނާއިފް
- ބަޖެޓް ސެކްރެޓަރީ: އަދަދު ނޫހުގެ އެސޯސިއޭޓް އެޑިޓަރު ނާޒިމް ހަސަން
ހުސްވެފައިވާ މަގާމުތަކަށް ބޭފުޅުން އިންތިހާބު ކުރުމަށް ފަހު، އެމްޖޭއޭއިން ވަނީ ކުރިއަށް ރާވާފައި ހުރި ބައެއް ކަންކަން އިއުލާނު ކޮށްފައެވެ. އެ ކަންތައްތަކުގެ ތެރޭގައި ހިމެނެނީ:
- އަންނަ އޮގަސްޓްމަހު ފޮޓޯ ޖާނަލިސްޓުންގެ މައުރަޒެއް ބޭއްވުން
- ނޫސްވެރިން ކުރި އެރުވުމަށް އެހީތެރިކަން ދޭން ބޭނުންވާ ފަރާތްތަކަށް ފަންޑެއް ހުޅުވާލުން
އޭގެ އިތުރުން، ޖަލްސާ އަށް ހާޒިރުވި އާންމު މެންބަރުން ވަނީ އެމްޖޭއޭގެ ކަންތައްތަކާ މެދު ހިޔާލު ފާޅުކޮށް، ހިންގުން ހަރުދަނާ ކުރާނެ ގޮތްތަކާ މެދުގައި، އަދި ނޫސްވެރިންނާ ގުޅުންހުރި ހަރަކާތްތައް އިތުރަށް ހިންގުން ފަދަ ކަންކަމާ ގުޅޭގޮތުން މަޝްވަރާކޮށް، ހިޔާލު ފާޅުކޮށްފައެވެ.
އެމްޖޭއޭގެ ބޯޑުގެ މެންބަރުން ތިން އަހަރު ދުވަހުގެ ދައުރެއް ފުރިހަމަ ކުރަން ޖެހޭނެއެވެ. ތިން އަހަރު ދުވަސް ހަމަވުމުން، އެ މަގާމުތަކަށް އަލުން މެންބަރުން އިންތިހާބު ކުރަން ޖެހޭނެއެވެ. މިހާރު ތިބި މެންބަރުންގެ ދައުރު ހަމަވާނީ އަންނަ ސެޕްޓެމްބަރު މަހުގެ 17 އަށެވެ.
