ބަންގްލަދޭޝްގެ އެންމެ ބޮޑު ބަނދަރު ސަރަހައްދާ ދާދި ކައިރީގައި އޮންނަ ގުދަނެއްގައި މިދިޔަ ހަފުތާ ބަންދުގައި ރޯވި ވަރުގަދަ އަލިފާންގަނޑު، 3 ދުވަހަށް ފަހު މިއަދު ކޮންޓްރޯލް ކުރެވިފައި ވާ ކަމަށް ހަބަރު ލިބިއްޖެއެވެ.
ރައްކާތެރިކަމުގެ މިންގަނޑުތަކާ ހިލާފުވުމުގެ ސަބަބުން ހިނގި ކަމަށް ބެލެވޭ އަލިފާނުގެ ވަރުގަދަ ހާދިސާގައި މަރުވި މީހުންގެ އަދަދު 40 އަށް ވުރެ މައްޗަށް އަރައެވެ. ބައެއް މީޑިއާ ރިޕޯޓްތައް ބުނާ ގޮތުގައި މަރުވި މީހުންގެ އަދަދު 41 އަށް އަރާ އިރު، އެ އަދަދު 49 އަށް އަރާފައި ވާ ކަމަށްވެސް ހަބަރު ލިބިފައިވެއެވެ. މި ހާދިސާގައި އެތައް ސަތޭކަ ބަޔަކު ވަނީ ޒަހަމްވެފައެވެ.
ހާދިސާ ހިނގަން މެދުވެރި ސަބަބު އަދިވެސް ކަށަވަރު ކުރެވިފައި ނުވި ނަމަވެސް، އަލިފާނުގެ ހާދިސާއަށް މަގުފަހި ކުރި މައި މަސްދަރަކީ ހައިޑްރޯޖަން ޕެރޮކްސައިޑް ކޮންޓޭނަރެއް ކަމަށް ޝައްކު ކުރެވެއެވެ.
އަލިފާން ނިއްވުމުގެ މަސައްކަތާ ބެހޭ ގޮތުން ސީނިއާ ފަޔާ ސާވިސް އޮފިޝަލު މުނީރު ހުސައިން ވިދާޅުވީ އަލިފާންގަނޑު އަދިވެސް މުޅިން ނިއްވާ ނުލެވޭ ކަމަށެވެ. ނަމަވެސް އިތުރު ގޮވުމެއްގެ ނުރައްކާ ކަމަށާ، ކެމިކަލް ހުރި ކޮންޓޭނަރުތަކަށް ހަދަން ޖެހޭ ގޮތްތައް ހަދާފައި ވާ ކަމަށްވެސް މުނީރު ހުސައިން ވަނީ ވިދާޅުވެފައެވެ.
ހާދިސާ ހިނގި ގުދަން ފެސިލިޓީގެ އިސްވެރިޔާ، ފޯނަށް ޖަވާބު ދީ ފައި ނުވާ ކަމަށް އަލްޖަޒީރާއިން ވަނީ ރިޕޯޓް ކޮށްފައެވެ.
ބަންގްލަދޭޝްގެ ހޯމް މިނިސްޓަރު، އަސަދުއްޒަމާން ހާން ވިދާޅުވީ ހާދިސާޣެ ތަހުގީގު މިހާރު ފަށާފައި ވާ ކަމަށާ، ޒިންމާ އުފުލަންޖެހޭ ފަރާތްތައް، އިންސާފުގެ ކުރިމައްޗަށް ހާޒިރު ކުރައްވާނެ ކަމަށެވެ.
މަރުވި މީހުންގެ އަދަދު 49 އަށް އެރި ކަމަށް ރިޕޯޓް ކޮށްފައި ވަނީ، މަރުވި މީހުންގެ އަދަދު ގުނުމުގައި އެރި އޮޅުންތަކެއްގެ ސަބަބުން ކަމަށް ފުލުހުންނާ ހަވާލާދީ އަލްޖަޒީރާއިން ވަނީ ރިޕޯޓް ކޮށްފައެވެ. މަރުވި މީހުންގެ ތެރޭގައި 9 ފަޔާ ފައިޓަރަކުވެސް ހިމެނެއެވެ. އަދި 3 މީހަކަށް ވީނުވީއެއް ނޭނގި ގެއްލިފައި ވާ ކަމަށްވެސް ހަބަރު ލިބެއެވެ.
