ދިވެހިރާއްޖެއަށް މަސްތުވާތަކެތި އެތެރެކޮށް މަސްތުވާތަކެތީގެ ވިޔަފާރި ކުރާކަމަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައި 42 ކީލޯގެ މަސްތުވާތަކެތި ހޯދައި ހައްޔަރު ކުރި ކ. މާލެ، މ. ނޫރުއް، އަބްދުﷲ ނަޝީދު (46އ)ގެ ބަންދަށް އިތުރު 10 ދުވަސް ޖަހައިފިއެވެ.
މިމައްސަލައިގެ އިއްޔެ ބޭއްވި އަޑުއެހުމުގައި ނަޝީދުގެ އަތުން ގިނަ އަދަދެއްގެ ފައިސާ ފެނިފައިވާ ކަމަށް ފުލުހުން ކޯޓުގައި ބުނެފައެވެ. އަދި އޭނާ މަސައްކަތް ކުރާ އޮފީހުން މައްސަލައާ ގުޅުން ހުރި ލިޔެކިޔުންތައް ފެނިފައިވާ ކަމަށް ވެސް ފުލުހުން ވަނީ ބުނެފައެވެ.
މީގެ އިތުރުން ސީން އަށް ދިޔަ ފުލުހުންގެ ބަޔާނާއި ހެކިވެރިއެއްގެ ބަޔާނާއި އިންޓެލިޖެންސް ރިޕޯޓާއި ކޯލް ޗާޓު ވެސް ހެކީގެ ގޮތުގައި ވަނީ ހުށަހަޅައިފައެވެ.
މިމައްސަލާގައި އިއްޔެ ވަނީ މައްސަލައިގައި ލިބިފައިވާ ހެކިތަކަށް ރިއާޔަތް ކުރެއްވުމަށް ފަހު، ނަޝީދުގެ ބަންދަށް 10 ދުވަސް އިތުރު ކުރަން ނިންމާފައެވެ.
މީގެ ކުރިން ނަޝީދުއަށް ވަނީ ބަންދަށް 15 ދުވަސް ޖަހާފައެވެ.
މާޗް 24، 2022 އަދި 25 ވަނަ ދުވަހު ހިންގި މި އޮޕަރޭޝަންގައި ނަޝީދުގެ އިތުރުން ހައްޔަރުކޮށްފައި ވަނީ ކ. މާލެ، ދަފްތަރު ނަންބަރު ރސ 3840، އަހްމަދު ހުސައިން (39އ) އެވެ.
މާލޭގެ މާފަންނުގައި ހުންނަ މ. ލަވްނެސްޓުގެ ކޮޓަރިއެއްގެ ތަޅުން ދަށުން 42 ކިލޯގެ މަސްތުވާތަކެތި ފެނުނު މައްސަލައިގައި ފުރަތަމަ ހައްޔަރު ކުރީ ނަޝީދެވެ. އޭރު 2 ވަނަ މީހާ، ޕީއެންސީގެ ކައުންސިލް މެންބަރަކަށް އޭރު ހުރި އަހްމަދު ހުސައިން އުޅުނީ ފިލައިގެންނެވެ.
މިހާރު އޭނާ ކައުންސިލުން ވަކިކޮށްފައި ވާއިރު، އޭނާ ބަންދު މަޖިލީހުގައި ބުނެފައި ވަނީ، އޭނާއާ މެދު ބަޔަކު މައްސަލަ ޖައްސާފައި ވަނީ އޭނާއަށް ދެރައެއް ދިނުމުގެ ގޮތުން ކަމަށެވެ.
