ހަބޭސް އިއްބެ އޭ ބުނުމުން އެއީ ކާކުކަން ނޭނގޭ މީހުން ވަރަށް މަދުވާނެއެވެ. އިބްރާހިމް މަހުދީ ހުސައިން (އިއްބެ) ނުވަތަ ހަބޭސް އިއްބެއަކީ ފުޓްސަލްގައި މުޅި ރާއްޖެއިން ހޮވާލެވޭ ހުނަރުވެރި މޮޅު ކުޅުންތެރިއެކެވެ.
މިނިވަން 50 ޗެމްޕިއަންޝިޕް މުބާރާތުގައި ފޭދޫ ޓީމުގައި ކުޅުނު ހުނަރުވެރި މޮޅު ކުޅުމުގެ ސަބަބުން ފުރަތަމަ ޑިވިޝަނަށް ކުޅުމުގެ ފުރުސަތު އިއްބެއަށް ތަނަވަސްކޮށްދިނީ ކޯޗު ނިޒާމްބެއެވެ. ނިޒާމްބެގެ އިރުޝާދުގެ ދަށުން އިއްބެ ވަނީ ޓީސީގައި މޮޅަށް ކުޅެ އެޓީމަށް ބޮޑެތި ކާމިޔާބީތައް ހޯދާދީފައެވެ.
އިއްބެ މިކާމިޔާބީ ކެރިއާ ފެށުނު ގޮތް ބަލާލަމާ ހެއްޔެވެ. މިހާރު އުމުރުން 28 އަހަރުގެ އިއްބެ ކުޑައިރުންސުރެ ފުޓުބޯޅަ ކުޅުމަށް ޝއުގުވެރިކަން ހުރެއެވެ.
ކެރިއާ ފެށުނު ގޮތް:
އިއްބެ ފުރަތަމަ ކުޅުނީ ރަށުގައި "ހަބޭސް ޓީމަށެވެ. އިއްބެ ފުރަތަމަ ކުޅުނީ ފުޓްސެލްއެވެ. އެއަށްފަހު އަތޮޅު މުބާރާތާ ޒޯން މުބާރާތްތައް ކުޅުނުއިރު ދެން އޭނާ ކުޅެން ފެށީ ފޭދޫ ޓީމަށެވެ. ފޭދޫ ޓީމަށް އޭނާ ކުޅުނީ ފުޓުބޯޅައެވެ.
އޭރު އިިއްބެ ގިނަ ބަޔަކަށް ނޭނގެއެވެ. ނަމަވެސް މިނިވަން 50 ގައި އައްޑޫގައި އޮތް މުބާރާތުގައި ގިނަ ބަޔަކަށް ވަނީ އޭނާގެ މޮޅު ކުޅުން ދައްކާ އާޝޯހު ކޮށްލާފައެވެ. މި މެޗުގައި ފައިނަލްއަށް ގޮސް، އޭނާ ވަނީ މޮޅު ގޯލެއް ޖަހާ އެތައް ބަޔަކު ހައިރާން ކޮށްލާފައެވެ.
މި މެޗަށްފަހު އިއްބެ ވަނީ ޕްރެޒިޑެންޓް ކަޕަށް މާލެ އައިސްފައެވެ. ފޭދޫ ޓީމަށް ކުޅުނު މި މެޗުގައި އިއްބެ މާރިޔާ ކޮޅަށް ގޯލެއް ޖަހާ ހުނަރުދައްކާލިއެވެ.
އިއްބެ ބުނިގޮތުގައި އަލަށް ގަލޮޅު ދަނޑުގައި ކުޅުނު ދުވަހު ވެސް ފުޓުބޯޅަ ކުޅެވޭނެ ކަން އެނގުނުނެވެ.
އޭރު ރިސޯޓުގައި މަސައްކަތް ކުރަމުން ދިޔަ އިއްބެއަށް ޓީސީއާ ގުޅުމުގެ ފުރުސަތު ލިބުނެވެ. އަދި ރިސޯޓުން ކެނޑިގެން ޓީސީއާ ގުޅެން އޭނާ ނިންމިއެވެ.
ޓީސީއާ ގުޅުނު ފަހުން އޭނާ އަލަށް ވެސް ކުޅުނީ އިންޓަނޭޝަނަށް މުބާރާތެކެވެ.
މިމުބާރާތުގައި އޭނާ ދެއްކި ކުޅުމަށް ގިނަ ބައެއްގެ ސަމާލު ކަމަށް ލިބިފައި ވާއިރު މިއީ އިއްބެގެ ކެރިއަރަށް ވެސް ލިބުނު ވަރަށް ބޮޑު ކާމިޔާބީއަކަށް ވިއެވެ. މި މެޗަށް ފަހު އިއްބެއަށް ވަނީ ގައުމީ ޓީމަށް ކުޅެން ފުރުސަތު ލިބިފައެވެ. ގައުމީ ޓީމަށް ވަނުމުގެ ފުރުސަތު ލިބުނު ނަމަވެސް އިއްބެ އޭރު އިންނަނީ ބެންޗުގައެވެ. ބަދަލު ކުޅުންތެރިއަކަށް ވެސް އަރަން ޗާންސް ނުލިބުނު އިއްބެ ގައުމީ ޓީމަށް ފުރަތަމަ ވެސް ކުޅުނީ ސާފު ޗެމްޕިއަންޝިޕް ގައި 2018ގައެވެ.
ބަންގްލަދޭޝް އާއި ރާއްޖެ ވާދަ ކުރި ފައިނަލް މެޗުގައި ގޯލެއް ޖަހާ ގިނަ ބަޔަކަށް އަނެއްކާ ވެސް ސާބިތުކޮށް ދިނީ އޭނާގެ މޮޅު ކުޅުމެވެ. ސާފުގައި ރާއްޖެއަށް ތަށި ހޯދައިދިނުމައި އިއްބެގެ ރޯލު ވަރަށް ވެސް ބޮޑެެވެ.
އެއަހަރު އިއްބެ ވަނީ މާޒިޔާ އާ ގުޅިފައެވެ. ފުޓުބޯޅައިގެ މިކެރިއަރުގައި މިހާތަނަށް އިއްބެ ވަނީ ގައުމީ ޓީމަށް 5 ލަނޑު ޖަހާދީފައެވެ. ޓީސީގައި އުޅުނުއިރު އިއްބެ ވަނީ ފުރަތަމަ ސީޒަންގައި 17 ގޯލު ޖަހާފައެވެ. ދެވަނަ ސީޒަންގައި 16 ގޯލު ވަނީ ޖަހާފައެވެ.
އިންޖަރީއެއް ވެގެން ވަރަށް މުހިންމު އަދި ކުޅެން ވަރަށް ބޭނުންވި މެޗަކަށް އެންމެ ފުރިހަމަ ކުޅުން ނުދެއްކުނު މެޗެއް ކަމަށް އިއްބެ ބުނަނީ މިއަހަރުގެ ސާފު ޗެމްޕިއަންޝިޕް މުބާރާތް ކަމަށެވެ.
އިއްބެ އަކީ ދަނޑުމަތީގައި ވެސް އަހުލާގު ރަނގަޅު ގިނަ ބަޔަކު ބަލައިގަންނަ މީހެކެވެ. ކޮންމެ މެޗެއްގައި ވެސް މޮޅު ކުޅުމެއް ކުޅެން އަޒުމުގައި ހުރި އިއްބެ އެންމެ ދެކެން ބޭނުންވާ ދުވަހަކީ އަނެއްކާ ވެސް ސާފު ޗެމްޕިއަންޝިޕްގައި ކުޅެން ލިބި، ރާއްޖެއަށް އަނެއްކާވެސް ތަށި ހޯދައި ދިނުމެވެ.
މިހާތަނަށް އިއްބެއަށް ލިބުނު އެންމެ ބޮޑު ކާމިޔާބީއަކީ ސާފު ޗެމްޕިއަންޝިޕް 2018ގައި ގޯލު ޖެހުން ކަމަށް އޭނާ ބުނެއެވެ.
ބޭރުގެ ފުޓުބޯޅަ ކުޅުންތެރިންގެ ތެރެއިން އިއްބެ އެންމެ ސަޕޯޓުކުރަނީ ކްރިސްޓިއާނޯ ރޮނާލްޑޯއަށެވެ. އަދި އޭނާ އެންމެ ސަޕޯޓުކުރީ ރެއާލް މެޑްރިޑްއަށެވެ.
ފިޓްކޮށް ހުރުމަށް އިއްބެ ކެއުމަށް ވަރަށް ބަލާ!
އިއްބެ ބުނިގޮތުގައި އޭނާ ފިޓްކޮށް ހުރުމަށް މާބޮޑު ކަމެއް ނުކުރެއެވެ. ނަމަވެސް ފިޓްކޮށް ހުރުމަށް އޭނާ ކެއުމަށް ވަރަށް ބޮޑަށް ބަލާ ކަމަށް ބުންޏެވެ. މިގޮތުން ފަލަވާ ކަހަލަ އެއްޗެހި ވަރަށް މަދުން ނޫނީ ނުކައި ކަމަށް އޭނާ ބުނެއެވެ.
ފުޓުބޯޅަ ކުޅުމަކީ މިކަމަށް ހުސްވެގެން ކެރިއާ އެއްގޮތުގައި ކުޅެން އަދި އާމްދަނީ އާ ހުރިހާ އެއްޗަކަށް ބަލާފައި ކުޅެން ރަނގަޅު އެއްޗެއް ކަމަށް އިއްބެ ގަބޫލު ކުރެއެވެ.
އާމްދަނީ ހޯދުމަށް ފުޓުބޯޅަކުޅުމުގެ އިތުރުން އިއްބެ މަސައްކަތް ކުރަނީ ވެމްކޯގައެވެ.
އިއްބެ ގަބޫލުކުރާގޮތުގައި ޒުވާން ކުޅުންތެރިނަށް ފުރުސަތުތައް ފަހިކޮށްދިނުމަކީ ވަރަށް މުހިންމު ކަމެކެވެ.
މި ކާމިޔާބު ކެރިއަރަށް އިއްބެ އެންމެ ބޮޑު ޝުކުރެއް އަދާކުރަން ބޭނުންވަނީ އޭނާގެ އާއިލާއަށް އަދި ޓީސީގެ ކޯޗު، ނިޒާމްބެ އަދި އަބްދުﷲ ހަނީފް (ބެންޖޯ)އަށެވެ.
އިއްބެ ސަޕޯޓަރުންނަށް ބުނެލަން ބޭނުންވަނީ "އަބަދުވެސް ސަޕޯޓު ކުރާށޭ، އަބަދުވެސް އެންމެ ބެސްޓު ދައްކާނެ" ކަމަށެވެ.
