ރަޝިއާއިން ޔޫކްރައިންގައި ކުރަމުން ދާ ހަނގުރާމަ އެންމެ ވަރުގަދަ ކޮށްފައި ވާ މަރިއުޕޮލް ސަރަހައްދަށް، ރަޝިއާގެ އަސްކަރިއްޔާއިން ކޮންމެ 30 މިނެޓަކުން ބޮން އަޅާ ކަމަށް ހަބަރު ލިބިއްޖެއެވެ.
އޮންލައިން ޕޯސްޓެއްގައި މަރިއުޕޮލްގެ މޭޔާރު ވަޑީމް ބޮއިޗެންކޯ ވިދާޅުވީ، ރަޝިއާގެ މަތިންދާބޯޓުތައް ކޮންމެ 30 މިނެޓަކުން އެ ސިޓީ މަތިން ދަތުރު ކުރާ ކަމަށެވެ. އަދި އާންމު ރައްޔިތުން ދިރިއުޅޭ އިމާރާތްތަކަށް ހަމަލާ ދީ، ދޮށީ އުމުރުގެ މީހުންނާއި އަންހެނުންނާއި ކުޑަކުދިން ހިމެނޭހެން، އާންމުން މަރާ ކަމަށެވެ.
މޭޔަރަށް ލަފާ އަރުވާ މުޝީރު ޕެޓްރޯ އަންދްރުޝެންކޯ ވިދާޅުވީ، ރަޝިއާއިން އުޅެނީ (ޔޫކްރައިންގެ) ރައްޔިތުން "ޑިލީޓް" ކުރަން ކަމަށެވެ. އަދި ރަޝިއާއިން ބޭނުންވަނީ ރަށްކާތެރި ހިސާބުތަކަށް މީހުން ބަދަލު ކުރުމުގެ މަސައްކަތް ހުއްޓުވާލަން ކަމަށެވެ.
ފެބުރިއަރީ 24 ވަނަ ދުވަހު ރަޝިއާއިން ޔޫކްރައިންއަށް އަރާ، ކުރަމުން ދާ ވަރުގަދަ ހަނގުރާމާގައި، 280 އަށް ވުރެ ގިނަ، އިލްމީ މަރުކަޒުތަކަށް ހަމަލާ ދީފައި ވާ ކަމަށް ޔޫކްރައިންގެ ތައުލީމާ ބެހޭ ވަޒީރު ސެރްހީ ޝްކާލެޓް ވަނީ ވިދާޅުވެފައެވެ.
ރަޝިއާއިން ދޭ ބަޑިއާއި ބޮމުގެ ހަމަލާތަކުގައި ހަލާކުކޮށް، ސުންނާފަތި ކޮށްފައި ވާ އިލްމީ މަރުކަޒުތަކުގެ ތެރޭގައި ތުއްތު ކުދިން ކިޔަވަން ދާ ކިންޑާގާޓޭން ސްކޫލްތަކާ، އާންމު ސްކޫލްތަކުގެ އިތުރުން ވޮކޭޝަނަލް ސްކޫލްތަކާ، ކޮލެޖުތަކާ ޔުނިވަސިޓީތައްވެސް ހިމެނޭ ކަމަށް ވަޒީރު ވަނީ ވިދާޅުވެފައެވެ.
މި ހުރިހާ ކަމަކަށް ވުރެވެސް ބޮޑު ގެއްލުމަކީ، އަދުއްގެ އަތްދަށުގައި މަރުވެ ދިޔަ އާންމުން ރައްޔިތުން ކަމަށްވެސް ޔޫކްރައިންގެ ތައުލީމާ ބެހޭ ވަޒީރު ވަނީ ވިދާޅުވެފައެވެ.
