ޔުކްރައިނުގައި ތިބި ދިވެހިން ސަރުކާރުގެ ހަރަދުގައި ރައްކާތެރި ތަނަކަށް ބަދަލުކުރަން ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފް ގޮވާލައިފިއެވެ.
ރަޝިއާ އާއި ޔޫކްރައިނުގެ މަޝްރަހު ހޫނުވެފައި ވާއިރު "ކޮންމެ ވަގުތަކުވެސް" ރަޝިއާ އިން ޔޫކްރައިނަށް ހަމަލާދީފާނެ ކަމަށް އެމެރިކާ އާއި އިނގިރޭސިވިލާތުން ވަނީ ބުނެފައެވެ. އަދި މިއަދު ދިވެހި ރާއްޖޭގެ ސަރުކާރުން ވަނީ ޔޫކްރައިނަށް މިވަގުތު ދިވެހިން ދަތުރު ނުކުރަން ވެސް އިލްތިމާސް ކޮށްފައެވެ.
ޔޫކްރައިންގައި ތިބި ދިވެހި ދަރިވަރުންތަކެއް މިއަދު ނެރުނު ބަޔާނުގައި ބުނީ އެ ދަރިވަރުން ތިބީ ރަޝިއާގެ ބޯޑަރާ އެންމެ ކައިރީގައިވާ ސިޓީގައި ކަމަށާއި ރަޝިއާއާއި ޔޫކްރައިން އާ ދެމެދު ހަމަލާ ބަދަލުކުރަން ފަށައިފިނަމަ އެކަމުގެ ސަބަބުން އެ ކުދިންނަށް އެކަމުގެ ބިރުވެރިކަމާ ކުރިމަތިލާން ޖެހޭނެ ކަމަށެވެ. އަދި އެންމެ ފުރަތަމަ ދުވަހުން ފެށިގެން މިކަމާ ގުޅޭގޮތުން ދިވެހި ރާއްޖޭގެ ސަރުކާރުގެ އެއްވެސް އިދާރާއަކުން އެ ދަރިވަރުންނާ ނުގުޅާ ކަމަށާއި އެ ތަނުގައި އެންމެ ކައިރީގައި ހުންނަ ޖަރުމަންވިލާތުގެ ބާލިންގައި ހުންނަ އެމްބަސީގެ ފޯނު ނަންބަރުވެސް ހޯދަން ޖެހުނީ އަމިއްލައަށް ކަމަށް އެ ދަރިވަރުންގެ ބަޔާނުގައި ވަނީ ބުނެފައެވެ.
މީގެ އިތުރުން ޔޫކްރައިނުން އެނބުރި ގައުމަށް އައުމަށް އެހީތެރިކަން ހޯދުމަށްޓަކައި "ސަރުކާރުގެ ފަހަތުން ދުވަން ޖެހުމަކީ" ކަންބޮޑުވާން ޖެހޭ ކަމަކަށް ވާއިރު، އަދި އެގައުމުގައި ތިބީ މަދު ދިވެހި ދަރިވަރުންތަކެއް ކަމަށް ވީ ނަމަވެސް، 4،000 އަށް ވުރެ ގިނަ ދަރިވަރުން ތިބި ގައުމުތަކުންވެސް އެ ދަރިވަރުން އަނބުރާ އެ ގައުމުތަކަށް ގެންދިއުމުގެ މަސައްކަތް ކުރާ ކަމަށްވެސް ޔޫކުރައިންގައި ތިބި ދިވެހި ދަރިވަރުން ވަނީ ފާހަގަކޮށްފައެވެ.
އާދަމް ޝަރީފް ވިދާޅުވީ ޔޫކުރައިންގައި ތިބި ދިވެހި ދަރިވަރުންގެ ސަލާމަތަށްޓަކައި މިހާރަށްވުރެ ޒިންމާދާރުކަމާއެކު ސަރުކާރުން މަސައްކަތް ކުރަން ޖެހޭ ކަމަށެވެ. އަދި ސަރުކާރުގެ ހަރަދުގައި ހުރިހާ ދިވެހިން ރައްކާތެރި ތަނަކަށް ބަދަލުކުރުމަށް ނުވަތަ ރާއްޖެ ގެނައުމަށް އާދަމް ޝަރީފް ގޮވާލެއްވިއެވެ.
