ރޭ ބޮޑު ދިޔައިގައި ޅ.އަތޮޅު ކުރެންދުއަށް ވަރަށް ބޮޑަށް އުދަ އެރުމުގެ ސަބަބުން އެ ރަށުގެ ފުޓުބޯޅަ ދަނޑަށާއި 2 ގެޔަކަށް ބޮޑެތި ގެއްލުން ތަކެއް ލިބިއްޖެއެވެ.
"ދަ ޕަރެސް" އަށް މައުލޫމާތު ދެއްވަމުން ކުރެންދޫ ކައުންސިލްގެ މެމްބަރު ވަފިއްޔާ މުހައްމަދު ވިދާޅުވީ އުދަ އަރަން ފެށިކަން ފާހަގަ ކުރެވުނީ ރޭ މެންދަމު ގާތްގަނޑަކަށް 1:30 ހާއިރު ކަމަށެވެ. އަދި އެ ރަށުގެ 3 ގެޔަކަށް އުދާއިގެ އަސަރުކޮށްފައިވާ ކަމަށާއި އޭގެ ތެރެއިން 2 ގެއެއްގެ ކަރަންޓް ސާމާނާއި ބެޑްރޫމްސެޓް ފަދަ ހުރިހާ އެއްޗެއް ވަނީ ބޭނުން ނުކުރެވޭ ވަރަށް ހަލާކުވެފާ ކަމަށް ވަފިއްޔާ ވިދާޅުވިއެވެ.
މީގެ އިތުރުން ކުރެންދޫގައި ޓާފް އަޅައިގެން ހަދާފައިވާ ފުޓްބޯޅަ ދަނޑަކީ ނަމޫނާ ދަނޑެއްގެ ގޮތުގައި މަޝްހޫރުވެފައިވާ ދަނޑެކެވެ. އުދައިގެ ސަބަބުން ފުޓްބޯޅަ ދަނޑަށް ވަނީ ގިނަ އަދަދެއްގެ އޮއްގާ އަރާފައެވެ. ކައުންސިލް މެމްބަރު ވަފިއްޔާ ވިދާޅުވީ އެ ރަށުގެ ފުޓުބޯޅަ ދަނޑު ބޭނުން ނުކުރެވޭ ވަރަށް ގެއްލުން ލިބިފައިވާ ކަމަށާއި ދަނޑުގެ ގޮނޑުދޮށާ ވީ ފަރާތުން ނަގާފައިވާ ފާރު ވެއްޓިފައިވާ ކަމަށާއި ކާޕެޓު އެއްކޮށްހެން ވަނީ ހަލާކުވެފައި ކަމަށެވެ.
އުދައިގެ ސަބަބުން ރަށުގައި ބޮޑުވެފައިވާ ލޮނުގަނޑު ހިންދުމުގެ މަސައްކަތް ރަށުގެ އާއްމުންނާއި އެމްއެންޑީއެފް ގުޅިގެން އަންނަނީ ކުރަމުންނެވެ. އަދި މިހާރު ލޮނުގަނޑު ކުޑަވެފައިވާ ކަމަށް ވަފިއްޔާ ވިދާޅުވިއެވެ.
އެމްއެންޑީއެފް އިން ބުނީ ކުރެންދޫއަށް އުދަ އެރުމުގެ ސަބަބުން ސިފައިން ހަރަކާތްތެރިވަމުން އަންނަ ކަމަށެވެ. އެރަށަށް އުދަ އަރައިގެން ސިފައިންނަށް ރިޕޯޓް ކުރީ ރޭ މެންދަމު ގާތްގަނޑަކަށް 03:41 ހާއިރުއެވެ.
އިއްޔެ އިން ފެށިގެން ރާއްޖޭގެ ދެކުނުގެ ރަށްތަކަށް ވެސް އަންނަނީ ވިއްސާރަ ކުރަމުންނެވެ.
