މިދިޔަ އަހަރު ސުޕްރީމް ކޯޓުން 369 އަޑުއެހުން ބާއްވާ، 90 މައްސަލައެއްގައި ހުކުމްކޮށްފައިވާ ކަމަށް އެކޯޓުން ބުނެފިއެވެ.

މިއަދު ސުޕްރީމް ކޯޓަށް 13 އަހަރު ވެފައިވާއިރު އެ ކޯޓުގެ ތަފާސްހިސާބަށް ބަލާއިރު، އެކޯޓުގެ 13 ވަނަ އަހަރަކީ އޭގެ ކުރީ އަހަރުތަކަށްވުރެ ކާމިޔާބު އަހަރެއް ކަމަށް އެކޯޓުން ބުނެއެވެ.

އެގޮތުން 2020 ވަނަ އަހަރުގެ ސެޕްޓެންބަރު 18 އިން މި އަހަރުގެ ސެޕްޓެންބަރު 18 ވަނަ ދުވަހާ ހަމައަށް 225 މައްސަލަ ހުށަހެޅި، 121 މައްސަލަ ރަޖިސްޓްރީ ކޮށްފައިވާ ކަމަށް މިނިސްޓްރީން ބުނެއެވެ.

އޭގެ އިތުރުން ނިމިދިޔަ އަހަރުގެ ތެރޭގައި 369 އަޑުއެހުން ބާއްވާފައިވާއިރު، 90 މައްސަލައެއްގައި ހުކުމްކޮށްފައިވާ ކަމަށް ވެސް އެކޯޓުން ބުނެއެވެ. މިއީ، އޭގެ ކުރީ އަހަރު ހުކުމް ކުރި އަދަދަށް ވުރެ 29 ޕަސަންޓުގެ ކުރިއެރުމެއް ކަމަށް އެކޯޓުން ބުނެއެވެ.

ސުޕްރީމް ކޯޓުން ބުނީ އިންފޮމޭޝަން ޓެކްނޮލޮޖީގެ އާ ތަސައްވުރާއެކު، ސުޕްރީމް ކޯޓުގެ ޝަރީއަތުގެ މަޖިލީސްތައް ހިންގުމުގައި، ކަރުދާސް މަދުކޮށް، އިލެކްޓްރޯނިކް ވަސީލަތްތައް ބޭނުންކޮށްގެން ފަސޭހަކަމާ ހަލުވިކަމާއެކު މަސައްކަތް ކުރިއަށް ގޮސްފައިވާ ކަމަށެވެ.

އެގޮތުން މިދިޔަ އަހަރުގެ ތެރޭގައި ހާސިލުކުރި މުހިންމު އެއް ކާމިޔާބީއަކީ ޝަރުއީ ދާއިރާގެ ކޭސް ރިޕޯޓާ އެޕްލިކޭޝަން ތަރައްގީކުރުން ކަމަށް އެކޯޓުން ބުނެއެވެ.

އަދި ސުޕްރީމް ކޯޓު އުފެދުނީއްސުރެ މިއަދާ ހަމައަށް ސުޕްރީމް ކޯޓުން ނިންމާފައިވާ ނިންމުންތައް އެ އެޕްލިކޭޝަންއަށް އަޕްލޯޑްކޮށް، އެތެރޭގެ ބޭނުންތަކަށް އެ އެޕްލިކޭޝަން ބޭނުންކުރުމުގެ އިންތިޒާމު ހަމަޖެއްސުން ކަމަށް ވެސް އެކޯޓުން ވަނީ ބުނެފައެވެ.

ކޭސް ރިޕޯޓާ އެޕްލިކޭޝަންއަކީ ސުޕްރީމްކޯޓުގެ ފަނޑިޔާރުންގެ މަޖިލީހުގެ އިސްނެގުމަކަށް ފެށި ހާއްސަ ޕްރޮޖެކްޓެއް ކަމަށާ އެއެޕްލިކޭޝަން ޑިވެލޮޕްކޮށް ތަރައްގީ ކުރެވިގެންދިޔައީ ސުޕްރީމް ކޯޓުގެ ފަނޑިޔާރުންގެ ސީދާ ބެއްލެވުމުގެ ދަށުން ކަމަށް ކޯޓުން ބުނެއެވެ.

ކޯޓުން ބުނީ އެ މަސައްކަތަކީ، ވަރަށް ކުރު މުއްދަތެއްގެ ތެރޭގައި ޑިޕާޓްމަންޓްއޮފް ޖުޑީޝަލް އެޑްމިނިސްޓްރޭޝަންގެ އެހީތެރިކަމާއެކު ކޮށް ނިންމާލި މަސައްކަތެއް ކަމަށެވެ. އަދި މި މަސައްކަތުގެ ދެވަނަ ފިޔަވަހިނިމިގެންދާއިރު އެ އެޕްލިކޭޝަން ބޭނުންކުރުމުގެ އެކްސެސް ގާނޫނީ ވަކީލުންނާއި ގާނޫނު ކިޔަވާ ދަރިވަރުންނަށް ވެސް ހުޅުވާލެވިގެންދާނެ ކަމަށް ކޯޓުން ބުނެއެވެ.

ސުޕްރީމް ކޯޓުން ބުނީ މުޅި ދުނިޔެއަށް ކުރިމަތިވެފައިމިވާ އަލަމީ ވަބާގެ މި ދަތި ދަނޑިވަޅުގައިވެސް، ސުޕްރީމް ކޯޓަކީ، ފަސޭހަކަމާއެކު އަދުލުއިންސާފަށް ވާސިލުވެވޭނެ މަގުފަހިވެފައިވާ އަދި ރައްޔިތުންގެ އިތުބާރާއި ޔަގީންކަން ލިބިގެންވާ ތަނެއްގެގޮތުގައި ހަދާ، އަދުލުއިންސާފު ގާއިމުކުރުމުގެ މަސައްކަތް ހުއްޓުމެއްނެތި ކުރިއަށް ގެންގޮސްފައިވާ ކަމަށެވެ.

އަދި މިހާ ފުރިހަމަ ނަތީޖާއެއް ހާސިލުވެގެން ދިޔައީ، ސުޕްރީމް ކޯޓުގެ ފަނޑިޔާރުންނާ މުވައްޒަފުން ހުއްޓުމެއްނެތި ކުރެއްވި މިންނެތް މަސައްކަތާއި ހިތްވަރުން ކަމަށެވެ.

އެމަސައްކަތްތުގައި ޖުޑީޝަލް ސާވިސް ކޮމިޝަނާާ، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާ، ޝަރުއީ ކޯޓުތަކާ، ދައުލަތުގެ އިދާރާތަކުން ވެދޭ އެހީތެރިކަމާ އެއްބާރުލެއްވުން ކޯޓުން ވަނީ ފާހަގަކޮށްފައެވެ.

ސުޕްރީމް ކޯޓުގެ އަމާޒަކީ، ލިބިފައިވާ މަދު ވަސީލަތްތަކާއެކު ވެސް، އެންމެ ފުރިހަމަގޮތުގައި ރައްޔިތުންނަށް ހިދުމަތް ފޯރުކޮށްދިނުމާ، އަދުލު އިންސާފު ފޯރުކޮށްދިނުމުގައި ނަތީޖާނެރޭ ޒިންމާދާރު މުއައްސަސާއެއްގެ ގޮތުގައި ސުޕްރީމް ކޯޓު ހަރުދަނާކުރުން ކަމަށް އެކޯޓުން ބުނެއެވެ.