ސިއްހީ ދާއިރާގެ ޓާމިނޮލޮޖީ ތަކާއި ބަލިތައް ކޯޑް ކުރާނޭ ގޮތް ކިޔައިދިނުމުގެ ގޮތުން އިންޓަނޭޝަނަލް ކްލެސިފިކޭޝަން އޮފް ޑިޒީސަސް (އައިސީޑީ) 11 ގެ ތަމްރީން ޕްރޮގްރާމެއް 500 އަ ށްވުރެ ގިނަ ބައިވެރިންނާ އެކު ފަށައިފިއެވެ.
ސެޕްޓެމްބަރު 15، 16 އަދި 20 ވަނަ ދުވަހު ވާޗުއަލްކޮށް ކުރިއަށް ގެންދާ މިތަމްރީން ޕްރޮގްރާމުގައި ރާއްޖޭގެ ސިއްހީ ދާއިރާގައި މަސައްކަތްކުރާ ސަރުކާރާއި އަދި އަމިއްލަ ހިދުމަތްދޭ ފަރާތްތައް ހިމެނޭ ގޮތަށް 500 އަށް ވުރެގިނަ ސިއްހީ ހިދުމަތްތެރިން ބައިވެރިވެއެވެ.
އައިސީޑީ އަކީ މަރުވި ސަބަބު އަދި ބަލިތަކާއި ގުޅޭ ތަފާސް ހިސާބުތައް އެއްކުރުމަށްޓަކައި ދުނިޔޭގެ ސިއްހަތު ޖަމްއިއްޔާއިން އެކުލަވާލާފައިވާ ކޯޑިން ނިޒާމެކެވެ. މިވަގުތު ރާއްޖޭގެ ހޮސްޕިޓަލް އަދި ހެލްތު ސެންޓަރުތަކުގައި ބޭނުން ކުރަމުން ދަނީ އައިސީޑީގެ 10 ވަނަ ވާޝަންއެވެ. ދިވެހިރާއްޖެއަކީ އައިސީޑީގެ 11 ވަނަ ވާޝަން ބޭނުންކުރަން ފަށާ އެންމެ ފުރަތަމަ ގައުމުތަކުގެ ތެރޭގައި ހިމެނޭ ގައުމެކެވެ.
މި ތަމްރީން ޕްރޮގްރާމްގެ މައިގަނޑު މަގްސަދަކީ ބައިވެރިން ސިއްހީ ދާއިރާގެ ޓާމިނޮލޮޖީތަކަށް އަހުލުވެރި ކުރުވުމާއި ބަލިތައް އަދި މަރުވި ސަބަބު ބައިނަލްއަގްވާމީ މިންގަނޑަށް ކޯޑު ކުރެވި، ދުނިޔޭގެ ސިއްހަތު ޖަމްއިއްޔާއިން ގަބޫލުކުރާ ފެންވަރަށް ސިއްހީ ދާއިރާގެ ތަފާސް ހިސާބު ބެލެހެއްޓުމަށް މަގުފަހިކުރުވުމެވެ.
3 ދުވަހުގެ މި ތަމްރީނު ދެއްވަނީ ދުނިޔޭގެ ސިއްހަތު ޖަމިއްޔާގެ ފަރާތުން ކަނޑައަޅާފައި ވާ ދާއިރާގެ މާހިރުންނެވެ. މިތަމްރީން ޕްރޮގްރާމަށް ފަހު ސިއްހީ ތަފާސް ހިސާބުގެ ނިޒާމު އިތުރަށް ހަރުދަނާ ވެގެން ދާނެ ކަމަށް ހެލްތް މިނިސްޓްރީން ވަނީ ބުނެފައެވެ.
