ގްރޭޑް 1ގެ ގުރުއާން ފޮތުގެ ދެ ސޫރަތެއް އޮޅިފައިވާ މައްސަލައެއް ފެންމަތި ވެއްޖެއެވެ.
ގްރޭޑް 1ގެ ދަރިވަރުން ކިޔެވުމަށް މިހާރު ބޭނުންކުރާ ގުރުއާން ފޮތުގައި އޮޅިފައިވާ ދެ ސޫރަތަކީ ނަބާ ސޫރަތާއި ނަޒިއާތު ސޫރަތެވެ.
ސޫރަތުލް ނަބާގެ 24 ވަނަ އާޔަތުގެ މެދު ތެރެއިން ވަނީ ނާޒިއާތު ސޫރަތުގެ އާޔަތްތަކެއް ވަދެ އޮޅިފައެވެ. އެގޮތުން ނަބާގެ 24 ވަނަ އާޔަތުން ފެށިގެން ނަބާ ސޫރަތުގެ 31 ވަނަ އާޔަތާ ހަމައަށް ވަނީ ނާޒިއާތު ސޫރަތުގެ 8 ވަނަ އާޔަތުން 14 ވަނަ އާޔަތެވެ.
އެކަމާ ގުޅިގެން ރައީސް އޮފީހުގެ ތަރުޖަމާނު މުހައްމަދު މަބްރޫކު އަޒީޒު ވިދާޅުވީ ސޫރަތް އޮޅިފައިވާ މައްސަލަ ސަމާލުކަމަށް އައިސް ބަލަން ފަށާފައިވާ ކަމަށެވެ.
ގްރޭޑް 1 ގެ ދަރިވަރުންނަށް އެ ފޮތް ދީފައި ވާއިރު، އެފޮތް ބަދަލު ކުރާނީ ތޯ ނުވަތަ އަނބުރާ ދަރިވަރުންގެ އަތުން ނަގާނީތޯ އަދި ސާފެއް ނުއެވެ.
އެކަމާ ގުޅިގެން "ދަ ޕްރެސް" އިން އެޑިއުކޭޝަން މިނިސްޓަރު އައިޝަތު އަލީ އަށް ގުޅުމުން ފޯނު ނުނަންގަވާތީ މިނިސްޓްރީގެ ކޮމެންޓެއް ލިބިފައެއް ނުވެއެވެ.
ސޫރަތްތައް އޮޅުމާ ގުޅިގެން ގިނަ ބެލެނިވެރިން ވެސް އަންނަނީ ކަންބޮޑުވުން ފާޅުކުރަމުންނެވެ.
