ޖުޑިޝަލް ސާވިސް ކޮމިޝަން (ޖޭއެސްސީ) އަށް މެންބަރުން އައްޔަން ކުރާއިރު، ސިޔާސީ މީހުން ނުހިމެނުމަށް ގާނޫނުއަސާސީ އަށް އިސްލާހު ގެންނަން މަހިބަދޫ ދާއިރާގެ މެމްބަރު އަހުމަދު ތޯރިގު އަނެއްކާ ވެސް ރައްޔިތުންގެ މަޖިލީހަށް ހުށަހަޅުއްވައިިފިއެވެ.
ޖޭއެސްސީގެ ކޮމްޕޮޒިޝަން ބަދަލުކުރުމަށްޓަކައި ގާނޫނުއަސާސީ އަށް ބަދަލު ގެންނަން މެމްބަރު ތޯރިގު މިދިޔަ އަހަރު ވެސް ވަނީ ހުށައަޅުއްވާފައެވެ.
ތޯރިގު ވިދާޅުވީ ގާނޫނު އަސާސީ އިސްލާހުކޮށް، ޖޭއެސްސީގެ ކޮމްޕޮޒިޝަން ބަދަލުކުރުމަކީ މިހާރުން މިހާރަށް ކުރަންޖެހޭކަމެއްކަމަށެވެ. އެކަން ފަސްކުރެވެން ނެތްކަމަށް ދެކެވަޑައިގަންނަވާތީ ގާނޫނު އަސާސީ އިސްލާހުކުރުމަށް މަޖިލީހަށް އިސްލާހު ހުށައެޅުއްވީކަމަށް ވެސް ތޯރިގު ވިދާޅުވިއެވެ.
ދައުރު ނިމުމުގެ ކުރިން ޖޭއެސްސީގެ ކޮމްޕޮޒިޝަން ބަދަލުކުރާނެ ކަމުގެ ޔަގީންކަން ސަރުކާރުން އިއްޔެ ދީފައި ވަނިކޮށް، ތޯރިގު މިއަދު އަނެއްކާ ވެސް މަޖިލީހަށް ހުށަހެޅުއްވި ބިލުގައި އޮތީ އެކިއެކި މަގާމުތައް އަދާކުރައްވާ ބޭފުޅުންގެ ހައިސިއްޔަތުން އެ ކޮމިޝަންގައި ތިއްބަވާ މެމްބަރުން އުނިކުރުމަށެވެ. އެގޮތުން ރައްޔިތުންގެ މަޖިލީހުގެ ރައީސާއި މަޖިލީހުގެ މެމްބަރަކު ވެސް ޖޭއެސްސީގައި ހިމެނިވަަޑައިނުގަންނަވާ ގޮތަށް ބަދަލުކުރަން ބިލުގައި އެބަ އޮތެވެ.
ތޯރިގު ހުށައެޅުއްވި އިސްލާހުގައި ޖޭއެސްސީއަށް އައްޔަންކުރާ މެންބަރުންގެ ދައުރަކީ ފަސް އަހަރުގެ އެއް ދައުރެވެ.
ތޯރިގު ހުށައެޅުއްވި އިސްލާހުގައި ޖޭއެސްސީ އެކުލެވިގެންވާ ގޮތަކީ:
1- އުއްތަމަފަނޑިޔާރު.
2- ހައި ކޯޓުން އިންތިހާބުކުރާ ފަނޑިޔާރެއް.
3- ދަށު ކޯޓްތަކުން އިންތިހާބުކުރާ ފަނޑިޔާރެއް.
4- ވަކީލުން އިންތިހާބުކުރާ ވަކީލެއް.
5- ޔުނިވާސިޓީތަކުގައި ޝަރީއާ ކިޔަވައިދެއްވާ ލެކްޗަރާއިންްގެ ތެރެއިން އިންތިހާބުކުރާ ލެކްޗަރާ އެއް.
6- ގާނޫނީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން ރައީސުލްޖުމްހޫރިއްޔާ އައްޔަން ކުރައްވައި، މަޖިލީހުން ރުހުންދޭ ތަޖުރިބާކާރެއް.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުމުގައި ތަރުޖަމާން މަބްރޫކް އަޒީޒް ވިދާޅުވީ ދައުރު ނިމުނުގެ ކުރިން ޖޭއެސްސީގެ ކޮމްޕޮޒިޝަން ބަދަލުކޮށް، އެ ކޮމިޝަން މިނިވަން ކުރާނެ ކަމަށެވެ.
