ގުރޭޑު އެކެއްގެ ދަރިވަރުންގެ އަތުން ކްރިއޭޓިވް އާޓް ފޮތް އަތުލީ އެމާންދާ ކިޔަވައިދޭން ދަރިވަރުންގެ ފޮތެއް ނޯންނާތީ ކަމަށް އެޑިއުކޭޝަން މިނިސްޓްރީން ބުނެފިއެވެ.
މިނިސްޓްރީން މިއަދު ނެރުނު ބަޔާނެއްގައި ބުނީ ގުރޭޑު 1ގެ މުގައްރަރުތައް އިސްލާހު ކޮށްފައިވާތީ 2021 ގެ ދިރާސީ އާ އަހަރު ގުރޭޑު 1ގައި ކިޔަވައިދިނުމަށް ހަމަޖެހިފައި ވަނީ، ގެނައި އިސްލާހާ އެއްގޮތަށް ތައްޔާރުކޮށްފައިވާ އާ ފޮތްބަޔަކުން ކަމަށެވެ.
އެ ގޮތުން މިހިނގާ ދިރާސީ އަހަރާއި، ކުރިޔަށް އޮތް އަހަރުތަކުގައި ވެސް ގުރޭޑު 1ގައި ކިޔަވާ ދަރިވަރުންނަށް ކްރިއޭޓިވް އާޓް ކިޔަވައިދިނުމަށް ބޭނުން ކުރުމަށް ހަމަޖެހިފައި ވަނީ މުދައްރިސުން ބޭނުން ކުރުމަށް ތައްޔާރުކޮށްފައިވާ މުދައްރިސުންގެ ފޮތަކާއި، ކުރެހުމުގެ ނަމޫނާ ދެއްކުމުގެ ގޮތުން ކުލާހުގައި ހާއްސަކޮށް ގުރޫޕުތަކުގައި ބޭނުން ކުރުމަށް، ތައްޔާރު ކޮށްފައިވާ ސައިޒުގެ ގޮތުން ބޮޑު ހާއްސަ ރެފަރެންސް ފޮތެއް ކަމަށެވެ.
އެ ފޮތް ބޭނުން ކުރުމަށް ހަމަޖެހިފައިވަނީ 5 ދަރިވަރުންގެ ގްރޫޕްތަކުގައި ކަމަށާއި ކްރިއޭޓިވް އާޓު މާއްދާ ގުރޭޑު 1ގެ ދަރިވަރުންނަށް ކިޔަވާދޭން ދަރިވަރުންގެ ފޮތެއް ނޯންނާނެ ކަމަށް މިނިސްޓްރީން ބުނެއެވެ.
އެގޮތަށް ކަނޑައަޅާފައި ވަނީ، އެ މާއްދާއަކީ އެހެން މާއްދާތަކާ ހިލާފަށް މާއްދާގެ ފަންނީ ހުނަރުތައް ތަރައްގީ ކުރުމަށްޓަކައި ގިނަ އަމަލީ މަސައްކަތްތަކެއް ކުރުވާ ފަންނީ މާއްދާއަކަށް ވާތީ ކަމަށް މިނިސްޓްރީން ބުނެއެވެ.
މިދިޔަ އަހަރު ގްރޭޑް 1 އަށް ކްރިއޭޓިވް އާޓުފޮތް ދިނެވެ. މިއަހަރުވެސް ދަރިވަރުންނަށް ފޮތް ބެހިއެވެ. ނަމަވެސް ހުރިހާ ދަރިވަރުންނަށް ފޮތް ހަމަނުވުމުގެ ޝަކުވާ ބޮޑުވެ މިނިސްޓްރީން ބުނީ އެއީ ކޮންމެ 5 ކުއްޖަކަށް އޮންނަ ފޮތެއް ކަމަށެވެ.
