ހުސްވެފައިވާ އިލެކްޝަންސް ކޮމިޝަންގެ މެންބަރަކަށް މުހައްމަދު އާސިފް އައްޔަނުކުރަން ރައްޔިތުންގެ މަޖިލީހުން ފާސްކޮށްފިއެވެ.
އާސިފް އީސީގެ މެންބަރުކަމަށް އައްޔަނުކުރުމަށް ފާސްކޮށްފައިވަނީ 50 މެންބަރުންގެ ވޯޓުންނެވެ. ނުފެންނަކަމަށް އެއްވެސް މެމްބަރަކު ވޯޓެއް ނުދެއްވައެވެ.
އީސީގެ މެންބަރު ކަމަށް އައްޔަންކުރަން މަޖިލީހުގެ ރުހުން ހޯދަން ރައީސް އިބްރާހީމް މުހައްމަދު ސޯލިހު މަޖިލީހަށް ފޮނުއްވި ލިސްޓުގެ އެންމެ ކުރީގައި ވެސް އޮތީ އާސިފްގެ ނަމެވެ.
އާސިފް ވަނީ މީގެ އިލެކްޝަން ކޮމިޝަންގައި މަސައްކަތް ވެސް ކުރައްވާފައެވެ. އޭގެ އިތުރުން ފިލްމީ ދާއިރާގައި ވެސް އޭނާ ވަނީ މަސައްކަތް ކުރައްވާފައެވެ.
އިލެކްޝަންސް ކޮމިޝަންގެ މެންބަރަކު ކަމަށް ކުރިމަތިލުމުގެ ފުރުސަތު ހުޅުވާލާފައި މިވަނީ އިލެކްޝަން ކޮމިޝަންގެ ރައީސް ކަމުގެ މަގާމުގައި ހުންނެވި އަހްމަދު ޝަރީފް އެ މަގާމުން އިސްތިއުފާ ދެއްވުމާ ގުޅިގެންނެވެ.
ޝަރީފު އިސްތިއުފާ ދެއްވާފައިވަނީ މިމަހު 15 ވަނަ ދުވަހުއެވެ.
