ރައްޔިތުންގެ މަޖިލީހުގެ މެންބަރުންގެ ސޯޝަލް މީޑިއާ އެކައުންޓްތައް ވެރިފައި ކުރަން ފާސްކޮށްފިއެވެ.
ސޯޝަލް މީޑިއާ އެކައުންޓްތައް ވެރިފައި ކުރަން ހުށަހެޅުއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ.
އިއްޔެ ބޭއްވި މަޖިލީހުގެ ސުލޫކު ކޮމިޓީ ބައްދަލުވުމުގައި ވާހަކަދައްކަމުން ނަޝީދު ވަނީ މެންބަރުންގެ ނަމުގައި ފޭކް އެކައުންޓްތައް ހަދާ، ނުބައި މައުލޫމާތު ފެތުރުން ކަންބޮޑުވާ ހިސާބަށް ގޮސްފައިވާ ކަމަށެވެ.
އެހެންކަމުން މަޖިލީހުން މެންބަރުންގެ އެކައުންޓްތައް ވެރިފައިކޮށްދިނުމަކީ ވަރަށް މުހިންމު ކަމެއް ކަން ނަޝީދު ފާހަގަކުރެއްވިއެވެ.
އެ ހުށަހެޅުއްވުމަށް މަޑުއްވަރީ ދާއިރާގެ މެންބަރު އާދަމް ޝަރީފް ތާއީދު ކުރެއްވިއިރު އެ ކޮމިޓީގެ އަޣުލަބިއްޔަތުން އެ ހުށަހެޅުން ވަނީ ފާސްކޮށްފައެވެ.
އެ ހުށަހެޅުން ފާސްވުމުން ކޮމިޓީގެ މުގައްރިރު އަދި ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުލް ލަތީފް ވިދާޅުވީ ސޯޝަލް މީޑިއާ އެކައުންޓްތައް ވެރިފައިކުރުމަށް އިންތިޒާމުތައް ހަމަޖައްސާދިނުމަށް މަޖިލީހުގެ ސެކްރެޓޭރިއަޓްގައި ދަންނަވާނެ ކަމަށެވެ.
