ޔަމަންގައި ދިގުދެމިގެންދާ އިންތިހާ ބަނޑުހައިހޫނު ކަމަކީ، އިންސާނީޔަތާ ގުޅިފައިވާ ކަންކަމުގެ ތެރެއިން ހާއްސަ އިސްކަމެއް ދޭންޖެހިފައިވާ ބޮޑު ކަމެއް ކަމަށް، އދއިން ޔަމަނަށް ކަނޑައަޅާފައި ހުންނަވާ މަންދޫބު، މާޓިން ގްރިފިތުސް ވިދާޅުވެއްޖެއެވެ.
މަގާމާ ވަކިވެވަޑައިގަތުމުގެ ކުރިން އދގެ ސަލާމަތީ މަޖިލީހުގައި ތަގުރީރު ކުރައްވަމުން ގްރިފިތުސް ވިދާޅުވީ، ހަނގުރާމައިގެ ސަބަބުން ސުންނާފަތި ވެފައި ވާ ޔަމަނުގެ އާބާދީގެ 3 ބައިކުޅަ 2 ބައި ނުވަތަ، ގާތްގަނޑަކަށް 20 މިލިއަނެއްހާ މީހުންނަކީ، ދުވަހުން ދުވަހަށް ފުއްދަން ޖެހޭ ޒަރޫރީ ބޭނުންތައް ފުއްދުމަށްޓަކާ، ބައިނަލްއަގުވާމީ އިންސާނީ އެހީއަށް ބަރޯސާވާ ބައެއް ކަމަށެވެ.
މި މޭރުމުން ގްރިފިތުސް ވަނީ، ޔަމަނުގެ 5 މިލިއަނެއްހާ މީހުން ތިބީ، ބަނޑަށް ޖެހުމާއި ގުޅިފައިވާ ބަލިތަކަށް ހުށަހެޅުމާއި އެ ކަމުގައި މަރުވެ ދިއުމާ އެންމެ ފިޔަވަޅެއް ދުރުގައި ކަމަށް އިންޒާރު ކުރައްވާފައެވެ. އަދި އޭގެ ފަހަތުގައި އިތުރު 10 މިލިއަން އެބަ ތިބިކަންވެސް ގުރިފިތުސް ވަނީ ފާހަގަ ކުރައްވާފައެވެ.
ބަނޑަށް ޖެހުމަކީ ހަމައެކަނި ކާބޯތަކެތީގެ މައްސަލައެއް ނޫން ކަމަށާ، އެއީ އެއަށްވުރެ ފުނަށް، މޫލާފައި ވާ ކަމެއް ކަން ގްރިފިތުސް ވިދާޅުވިއެވެ. ބަނޑަށް ޖެހުމުގެ މައްސަލައަކީ، ޔަމަނަށް ކުރިމަތިލާން ޖެހިފައި ވާ ހުރިހާ މައްސަލައެއްގެ މަސްހުނި ގަނޑެއް ކަމަށާ، މިކަމަށް ފުރިހަމައަށް އިޖާބައެއް ޑިމާންޑް ކުރާ ކަމަށެވެ.
ޔަމަނު ބަނޑަށް ޖެހުމާ ގުޅިފައި ވާ އެންމެ ބޮޑު އެއް ސަބަބަކީ، އެގައުމުގެ ފައިސާގެ އަގު އިންތިހާއަށް ދަށަށް ދިއުމާއި، އިގުތިސޯދު އިނދަޖެހުމެވެ. އީރާންގެ އެއްބާރުލުމާއެކުގައި ހަރަކާތްތެރިވާ ހޫތީ ހަނގުރާމަވެރިން 2015 ވަނަ އަހަރު ޔަމަނުގެ ކޮންޓްރޯލް ނެގިފަހުން، ޔަމަނުގެ ގައުމީ އުފެއްދުންތެރިކަމުގެ ނިސްބަތް (ޖީޑީޕީ) ވަނީ 40 ޕަސެންޓް ދަށަށް ގޮސްފައެވެ.
މި ދުވަސްވަރަކީ އެމެރިކާ ޑޮލަރާ އަޅާ ބަލާއިރު ޔަމަނު ރިޔާލްގެ އަގު، އެންމެ ބޮޑަށް ވެއްޓިފައި ވާ ދުވަސްވަރެވެ.
