ދުނިޔޭގެ އެކި ކަންކޮޅުތަކުން އެތައް މިލިއަން ބަޔަކު ކޮންމެ ދުވަހަކުވެސް ކުޅެމުން އަންނަ ހިސާބު ޕަޒަލް ގޭމެއް ކަމަށް ވާ "ސުޑޯކޫ" އުފެއްދި، މަކީ ކާޖީ މަރުވެއްޖެއެވެ.
ތައުލީމު ފުރިހަމަ ނުކޮށް، ޔުނިވާސިޓީ ހަޔާތް މެދުކަނޑާލި މަކީ ކާޖީއަކީ ޖަޕާނުގެ ފުރަތަމަ ޕަޒަލް މެގަޒިން އުފެއްދި ބާނީއެވެ. މިކަމުގެ ތެރެއިން، 1980ގެ އަހަރުތަކުގައި، އޭނާ ސުޑޯކޫ އުފެއްދީ، އޭރުވެސް ބޭނުން ކުރަމުން ދިޔަ ހިސާބު ޕަޒަލްއަކުން ހިތްވަރު ލިބިގެންނެވެ.
ޖަޕާނުން ބޭރުގެ މީހުންގެ މެދުގައި ސުޑޯކޫ މަގުބޫލުވާން ފެށީ މީގެ 20 ވަރަކަށް އަހަރު ކުރިންނެވެ. ދުވަހު ނޫސް ފަދަ އަދަދުތަކުގައި މި ގޭމް ޝާއިއު ކުރަން ފެށި ހިސާބުންނެވެ. ސުޑޯކޫއަކީ ނަފްސާނީ ދުޅަހެޔޮ ކަމަށް އެހީވެދިނުމުގެ އިތުރުން ވިސްނުން ތޫނު ކުރުމަށްވެސް އެހީވެދޭ ކުޅިވަރެއް ކަމަށް ބުނެވެއެވެ.
2006 ވަނަ އަހަރުން ފެށިގެން، ބައިނަލްއަގުވާމީ ފެންވަރުގައި، ސުޑޯކޫ ޗެމްޕިއަންޝިޕެއްވެސް އޮވެއެވެ.
މަކީ ކާޖީގެ ނިކޯލީ ކުންފުނި އާންމު ކުރި ބަޔާނެއްގައި ބުނެފައި ވަނީ، ޕަޒަލް ކުޅުމަށް ލޯބިކުރާ ގިނަ ބައެއްގެ ލޯބި، މަކީ ކާޖީއަށް ލިބިފައި ވާ ކަމަށެވެ.
އުމުރުން 69 އަހަރުގައި، މަކީ ކާޖީ މި ދުނިޔެއާއި ވަކީވީ ކެންސަރު ބަލީގައި، މި މަހުގެ 10 ވަނަ ދުވަހު ކަމަށް ހަބަރު ލިބެއެވެ.
