ވަގުތީ ޕްރިންސިޕަލާއެކު ހދ. ހިރިމަރަދޫ ސްކޫލުގައި ކިޔެވުން ފަށައިފިއެވެ.
އެސްކޫލަށް ވަގުތީ ޕްރިންސިޕަލެއް ހަމަޖައްސާފައިވަނީ އެޑިއުކޭޝަން މިނިސްޓްރީގެ ފަރާތުންނެވެ.
ހިރިމަރަދޫ ކައުންސިލުން މައުލޫމާތު ދޭ ގޮތުގައި ޕްރިންސިޕަލްއާއެކު ސްކޫލުގެ ހުރި މައްސަލަތައް ހައްލުކުރުމަށް ވަނީ މަޝްވަރާ ވެސް ކޮށްފައެވެ.
މިދިޔަ އަންގާރަ ދުވަހު ދިރާސީ އާ އަހަރު ފެށުނު ނަމަވެސް ހިރިމަރަދޫ ސްކޫލްގެ ބެލެނިވެރިން ވަނީ ކުދިން ސްކޫލަށް ނުފޮނުވަން ނިންމައި އިހުތިޖާޖެއް ކޮށްފައެވެ. އެއާއެކު އެ ރަށަށް އެޑިއުކޭޝަން މިނިސްޓްރީގެ ޓީމެއް ވަނީ ގޮސްފައެވެ.
ހިރިމަރަދޫ ސުކޫލް ބެލެނިވެރިއެއް ބުނިގޮތުގައި 8 އަހަރުވީއިރު ވެސް އެ ސުކޫލުން އޯލެވެލް އިން ނަތީޖާއެއް ނުނެރެވެއެވެ. އަދި އޯލެވެލް އިން ފާސް ވަނީ ވެސް ވަރަށް މަދު ކުއްޖެއް ކަމަށާއި އެކަށީގެންވާ ވަރަށް ވުރެ ގިނައިން އެ ސުކޫލުގައި ޓީޗަރުން ތިބިކަން ވެސް ބެލެނިވެރިން ފާހަގަ ކޮށްފައި ވެއެވެ.
އެ ސުކޫލުގައި ތައުލީމު ހާސިލުކުރަމުން ދަނީ 64 ދަރިވަރުން ކަމަށާއި ކޮންމެ 3 ދަރިވަރަކަށް ޓީޗަރެއް ހުންނަ ކަމަށް އެރަށުން މައުލޫމާތުދިން ފަރާތުން ފާހަގަ ކޮށްފައި ވެއެވެ. މީގެ އިތުރުން ދިރާސީ އަހަރެއް ފެށިގެން ދިޔައިރު ދަރިވަރުން ސުކޫލަށް ފޮނުވަން ވީ ގަޑިއެއްވެސް ބެލެނިވެރިންނަށް އަންގާފައި ނުވާކަމަށާއި ޓައިމްޓޭބަލްގެ ހިސާބުވެސް ތައްޔާރު ކޮށްފައި ނުވާކަމަށް ފާހަގަ ކޮށްފައި ވެއެވެ.
އަދި ދިރާސީ އަހަރެއް ފެށިގެން ދިޔައިރު ސުކޫލުގެ އާބާތުރަ ފިލުވުމަށް އެއްވެސް މަސައްކަތެއް ކޮށްފައި ނުވާކަން ވެސް އޭނާ ބުނެއެވެ.
މީގެއިތުރުން ބިދޭސީ ޓީޗަރުންތައް ރަށަށް އައީވެސް އެޑިއުކޭޝަނުން ޓީޗަރުން ރިޕޯޓް ކުރުމަށް ކަނޑައަޅާފައިވާ ދުވަސް ކަމުގައިވާ އޯގަސްޓް 3 ވަނަ ދުވަހު ކަމަށާއި ބައެއް ޓީޗަރުން 5 ދުވަހު އަދި އަނެއްބައި ޓީޗަރުން 14 ދުވަހުގެ ކަރަންޓީނެއް ފުރިހަމަ ކުރަންޖެހޭ އިރު ސްކޫލު ހުޅުވުނު އިރު ބައެއް ޓީޗަރުން ތިބީ ކަރަންޓީނުގައެވެ. އަދި ސުކޫލުގެ ކިޔެވުން ފެށެންވީއިރުވެސް ޓީޗަރުންނަށް ސުކޫލަށް ނިކުމެވިފައި ނުވާކަން އެރަށުން މައުލޫމާތު ދިން ފަރާތުން ބުނެފައި ވެއެވެ.
