ތައުލީމުގެ ގާނޫނަށް އަމަލުކުރަން މިއަދު ފަށައިފިއެވެ.
އެޑިއުކޭޝަން މިނިސްޓްރީން ބުނީ މިއީ ރާއްޖޭގައި ތަންފީޒު ކުރެވޭ އެންމެ ފުރަތަމަ ތައުލީމުގެ ގާނޫނު ކަމަށެވެ.
މިއީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ކަށަވަރު ކޮށްދީފައިވާ އުނގެނުމުގެ ހައްގު އެންމެ ފުރިހަމަ ގޮތުގައި ލިބިދިނުމަށްޓަކާ ގާއިމުކުރަންޖެހޭ ގާނޫނީ އޮނިގަނޑު ގާއިމުކޮށް، ދިވެހިރާއްޖޭގެ ތައުލީމީ ނިޒާމު އެ މައްޗަށް ބިނާވެގެންވާ އަސާސްތައް ކަނޑައެޅުމާ އުނގެނުމާ ގުޅޭގޮތުން ދަރިވަރުންނަށާ މުދައްރިސުންނަށް ލިބިދޭ ހައްގުތައް ބަޔާންކޮށްދީފައިވާ ގާނޫނެއް ކަމަށް މިނިސްޓްރީން ބުނެއެވެ.
އޭގެ އިތުރުން ދައުލަތާ ބެލެނިވެރިންނާ މުދައްރިސުންގެ ޒިންމާތައް ކަނޑައެޅުމާ، ދިވެހިރާއްޖޭގައި ތައުލީމު ދިނުމާގުޅޭ އެނޫންވެސް އާންމު ހަމަތަކާ އުސޫލުތައް ބަޔާންކުރުމުގެ ގާނުނު ކަމަށް މިނިސްޓްރީން ވަނީ ބުނެފައެވެ.
މިއަދު އެ ގާނޫނަށް އަމަލު ކުރަން ފެށުމާ ގުޅިގެން، އެ ގާނޫނުގައި ކަނޑައަޅާފައިވާ ކަންކަމާމެދު ތައުލީމީ ދާއިރާގެ ފަރާތްތަކަށް މައުލޫމާތު ދިނުމަށާ، އެ ގާނޫނުގެ ހާޑްކޮޕީ ނެރުމަށް މިއަދު އެޑިއުކޭޝަން މިނިސްޓްރީ އިން ވަނީ ހާއްސަ ހަފްލާއެއް ބާއްވާފައެވެ. އެ ކޮޕީ ނެރެދެއްވީ މިނިސްޓާ އޮފް އެޑިޔުކޭޝަން ޑރ. އާއިޝަތު އަލީ އެވެ. އެ ހަފްލާގައި ރާއްޖޭގެ ސްކޫލްތަކުގެ އިސްވެރިން ވާޗުއަލްކޮށް ބައިވެރިވެފައިވާ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ އެ ގާނޫނުގެ މަގުސަދުތަކުގެ ތެރޭގައި ހަމަހަމަކަމާ އިންސާފުވެރިކަމާއެކު ރާއްޖޭގައި ފެންވަރު ރަނގަޅު ތައުލީމާ، ތަމްރީނާ އިސްލާމީ ތަރުބިއްޔަތު ދެވޭނެ މާހައުލެއް ގާއިމުކުރުމުގެ މަގުފަހި ކުރުމާ، ދިވެހި އިސްލާމީ މުޖުތަމައަށް ފެތޭ ރައްޔިތުންގެ އިތުބާރު ލިބޭ ތައުލީމީ ނިޒާމެއް ގާއިމްކުރުން ހިމެނޭ ކަމަށެވެ.
އެގާނޫނުގެ ދަށުން ކަނޑައެޅޭ ތައުލީމީ ސިޔާސަތުތަކުގެ ތެރެއިން ރައްކާތެރި އަދި އަމާން މާހައުލެއް ސްކޫލްތަކުގައި ގާއިމުކޮށްދީ، އަމާން މާހައުލެއްގައި ތައުލީމު ހާސިލުކުރެވޭނެ ނިޒާމެއް ގާއިމުކޮށްދިނުމަކީ އެޑިއުކޭޝަން މިނިސްޓްރީގެ މަސްއޫލިއްޔަތެއް ކަމަށް އެ މިނިސްޓްރީން ބުނެއެވެ.
