ވެލާނާ އިންޓަނޭޝަނަލް އެއާޕޯޓުން ފުރަން ގޮސް އުޅެނިކޮށް ވަޒަން ތަކަކާ އެކު ހައްޔަރު ކުރި ފަތުރުވެރިޔާގެ ބަންދަށް އިތުރު ހަތަރު ދުވަސް ޖަހައިފިއެވެ.
ވަޒަންތަކާ އެކު ހައްޔަރުކޮށްފައި ވަނީ އުމުރުން 60 އަހަރުގެ ނެމީބިއާގެ ފިރިހެނެކެވެ.
އެއާޕޮޓަށް ފުރަންގޮސް ހުއްޓާ އޭނާގެ ދަބަހުން ވަޒަން ތަކެއް ފެނިގެން އެ ފަތުރުވެރިޔާ ފުލުހުންގެ ބެލުމުގެ ދަށަށް ގެންގޮސްފައި ވަނީ މި މަހުގެ 10 ވަނަ ދުވަހުއެވެ.
މިމަހުގެ 12 ވަނަ ދުވަހު އޭނާގެ ބަންދަށް ވަނީ 3 ދުވަސް ޖަހާފައެވެ. އެ ފަތުރުވެރިޔާގެ ބަންދަށް އޭރު ދިން މުއްދަތު ހަމަވެފައި ވާތީ އޭނާގެ ބަންދަށް އިތުރު ހަތަރު ދުވަސް ކްރިމިނަލް ކޯޓުން ވަނީ ޖަހައިފައެވެ.
ފުރަން ގޮސް ހުރި މީހެއްގެ އަތުން ވަޒަންތަކެއް ފެނުނު މިހާދިސާ ހިނގި އިރު މި މަހުގެ 9 ވަނަ ދުވަހު ވަނީ ރައީސް އިބްރާހިމް މުހައްމަދު ސޯލިހު ދިރިއުޅުއްވާ މުލިއާގެ ކައިރިއަށް ދެމީހަކު ފޮށިގަނޑަކާއި ދަބަހަކާއި ރަތް ކޮތަޅެއް ހިފައިގެން ގޮސް އެތަން ގޮއްވާލާނެކަމަށް ބުނެ އިންޒާރުދީ އަޑުގަދަކުރަން ފެށުމުން، މުލިއާގެ ސެކިއުރިޓީން ވަނީ އެދެމީހުން ހިފަހައްޓާފައެވެ. ނަމަވެސް އެތަނުން އެކަކު ވަނީ ހަމަ އެރޭ ދޫކޮށްލާފައެވެ. ބަންދުގައި ހުރީ މުލިއާގެ ގޮއްވާލާނެ ކަމަށް އިންޒާރު ދިން މީހާއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މެއި ހައެއްގައި ދިން ބޮމުގެ ހަމަލާއަށް ފަހު މުޅި ރާއްޖޭގައި ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ. އަދި ދައުލަތުގެ ބައެއް އިދާރާތަކުގެ ކައިރީގައި ސިފައިން ގެންދަނީ ހަތިޔާރާ އެކު ފޯރި މަރަމުންނެވެ
