މާލެއިން ގޯއްޗެއް ގަތީ ލޯނެއް ނަގައިގެން: އަމްރު

މާލެއިން ގޯއްޗެއް ބައްލަވައިގަތީ ލޯނެއް ނަންގަވައިގެންކަމަށް، އެސްޓީއޯގެ މެނޭޖިން ޑިރެކްޓަރު ހުސައިން އަމްރު މިއަދު ވިދާޅުވެއްޖެއެވެ.

އަމްރު ވަނީ 49 އަހަރު ދުވަހަށްވުރެ ދިގު މުއްދަތެއްގައި ސަރުކާރަށް ހިދުމަތް ކުރެއްވި ހަބީބާ ހުސެއިން ހަބީބުގެ ގެ ކަމަށްވާ ގ.ވައިލެޓު އަބީރު 8.4 މިލިއަން ރުފިޔާއަށް ބައްލަވައިގެންފައެވެ. އެ ގޯއްޗަކީ 1183.7 އަކަފޫޓުގެ ބިމެކެވެ.

އަމްރު މި ގޯތި ބައްލަވައިގަތުމާއެކު ބައެއް ފަރާތްތަކުން ވަނީ އެކި ކަހަލަ ތުހުމަތުތައް ކޮށްފައެވެ. އެ ގޮތުން ވައްކަން ކޮށްގެން ނޫނީ އެ ހުރިހައި ފައިސާ އަމްރުއަކަށް ލިބިނުލައްވާނެކަމާއި، އަމްރުގެ މުސާރައަށް ބަލާއިރު, އޭނާއަށް އެ ގޯތި ބައްލަވައިގަނެވޭނީ ކިތައް އަހަރުންތޯ ވެސް ސުވާލުކޮށްފައިވެއެވެ.

މިކަން ސާފުކޮށްދެއްވަމުން އަމްރު ވިދާޅުވީ 2017 ވަނަ އަހަރު އޭނާ ކުއްޔަށް ނަންގަވައިގެން 03 ބުރީގެ އިމާރާތެއް ހަދައި، ރެސްޓޯރަންޓެއް ހިންގަން ތައްޔާރުވި ހިނދު, އެ ގޯތީގެ ވެރި ފަރާތުން ގޯތި ވިއްކައިލުމަށް ބޭނުންވި ކަމަށެވެ.

އެސްޓީއޯގެ އެމްޑީގެ މަގާމާއި ހަވާލުވެވަޑައިގެންނެވިއިރު އަމްރުގެ މިލްކިއްޔާތުގައި މާ ގިނަ މުދާ ނެތް ނަމަވެސް ދުވަސްކޮޅެއްވީ ތަނާހެން އަމްރު މާ ބޮޑަށް މުއްސަނދިވި ކަމަށާއި އެ ގޮތުން ޑޮމެއިންޖެހި އަގުބޮޑު ކާރެއް ދުއްވާއިރު އަގުބޮޑު އަތުކުރީ ގަޑިއެއް ގެންގުޅުއްވާކަމަށް އޮންލައިން ނޫހެއްގައި ތުހުމަތުކޮށްފައިވެއެވެ.

އަމްރު ވިދާޅުވީ މި ކަހަލަ ވާހަކަތައް އެނގިހުރެ މީހުންގެ އަގު ވައްޓައިލަން ލިޔުމަކީ ރަނގަޅުކަމެއް ނޫން ކަމަށާއި ލިޔަން ކޮންމެހެން ބޭނުންނަމަ ގުޅައިލާ މައުލޫމާތު ސާފުކޮށްލުމަކީ ނޫސްވެރިކަމުގެ އެއް އަސާސް ކަމަށެވެ. ހަމައެހެންމެ މީހުންނަށް އޮޅޭ ގޮތަށާއި، ދޮގު މައުލޫމާތު ލިޔުމަކީ ނޫސްވެރިކަމެއް ނޫންކަމަށް ވެސް އަމްރު ވިދާޅުވިއެވެ.