ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، އޮޑިޓާ ޖެނެރަލް ކަމުގެ މަގާމަށް ގަލޮޅު އައިފަ، ހުސައިން ނިޔާޒީ އައްޔަން ކުރައްވާ، މަގާމުގެ ފަތްކޮޅު މިއަދު ދެއްވައިއެވެ.
ރައީސް އޮފީހުން ބުނީ ހުސައިން ނިޔާޒީއަށް އޮޑިޓާ ޖެނެރަލް ކަމުގެ ފަތްކޮޅު ހަވާލު ކުރެއްވުމުގެ ރަސްމިއްޔާތު އޮތީ، މިއަދު މެންދުރުކުރީގައި ރައީސް އޮފީހުގައި ކަމަށެވެ.
ފަތްކޮޅު ދެއްވުމުގެ ކުރިން ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރުގެ ކުރިމަތީގައި، އޮޑިޓާ ޖެނެރަލް ކަމުގެ ހުވާ، ނިޔާޒީ ކުރައްވާ، ހުވާގެ އިގްރާރުގައި ސޮއިކުރައްވާފައިވާ ކަމަށް ރައީސް އޮފީހުން ބުނެއެވެ.
ނިޔާޒީއަކީ 2008 ވަނަ އަހަރު އިނގިރޭސިވިލާތުގެ ދި ޗާޓާޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް އިން އެސޯސިއޭޓް މެންބަރުކަން ހާސިލުކުރައްވާ ފައިވާ ފަރާތެކެވެ. އަދި، މީގެ ކުރިން ނިޔާޒީ ވަނީ އިންޑިޔާގެ ބެންގަލޯ ޔުނިވާސިޓީ އިން ބެޗެލާ އޮފް ކޮމާސް ހާސިލުކުރައްވާފައެވެ.
ނިޔާޒީ އަކީ އޮޑިޓާ ޖެނެރަލް އޮފީހުގެ ތަފާތު އެކި މަގާމުތައް ފުރުއްވާފައިވާ ފަރާތެއް ކަމަށް ރައީސް އޮފީހުން ބުނެއެވެ. އެގޮތުން ނިޔާޒީ ފުރުއްވި މަގާމުތަކުގެ ތެރޭގައި އެސިސްޓަންޓް އޮޑިޓާ ޖެނެރަލްގެ މަގާމާއި، އޮޑިޓް މެނޭޖަރުކަމުގެ މަގާމާ، އެސިސްޓަންޓް އޮޑިޓާ ކަމުގެ މަގާމު ވެސް ހިމެނޭ ކަމަށް ރައީސް އޮފީހުން ބުނެއެވެ.
ރައީސް އޮފީހުން ބުނީ ނިޔާޒީ އަކީ އިންސްޓިޓިއުޓް އޮފް ޗާޓާޑް އެކައުންޓަންޓްސް އޮފް ދި މޯލްޑިވެސްގެ ކައުންސިލް މެންބަރެއް ކަމަށެވެ. އަދި، އިންސްޓިޓިއުޓް އޮފް ޗާޓާޑް އެކައުންޓަންޓްސް އޮފް ދި މޯލްޑިވެސްގެ އެޑްމިޝަން އެންޑް ލައިސަންސިން ކޮމިޓީގެ ޗެއާޕާސަން ކަމަށްވެސް ރައީސް އޮފީހުން ބުނެއެވެ.
ނިޔާޒީއަކީ އެ ދާއިރާއާ ގުޅޭ ތަފާތު އެކި މަގާމުތައް ފުރުއްވާ ތަޖުރިބާ ހޯއްދަވާފައިވާ ފަރާތެއް ކަމަށް ރައީސް އޮފީހުން ބުނެއެވެ.
