ޕެޓަލިންގް ޖާޔާ ސަރަހައްދުގައި، ގަލާއި ދަނޑި ބޭނުންކޮށްގެން ހަދާފައި ހުރި ގެއެއްގެ ބޭރުގައި، ހުދު ދިދައެއް ނަގާފައި ހުއްޓެވެ. މާ ބޮޑު ފަރުވާލެއް ނެތް ގޮތަށް ތައްޔާރު ކޮށްފައިވާ އެ ދިދަ އެތަނުގައި ޖެހީ، އެ ގޭގައި ދިރިއުޅެމުން އަންނަ، އުމުރުން 64 އަހަރުގެ ޖަމްބޫ ނޭތަން ކަނަގަސަބާއީއެވެ.
ސަބަބެއް ނެތިއެއް ނޫނެވެ. ސޯޝަލް މީޑިއާއިން އެނާއަށް ފެނުނު ޕޯސްޓަކާ ގުޅިގެންނެވެ. އެ ޕޯސްޓް ހާއްސަ ކޮށްފައި ވަނީ ދުނިޔެ އިނދަޖައްސާލީ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމުގައި އެކި ކަހަލަ ތަކުލީފުތައް އުފުލަމުންދާ މީހުންނަށެވެ. އާންމުންގެ ފަރާތުން އެހީގެ އަތެއް ލިބިދާނެ ކަމުގެ އުއްމީދު، އެ ޕޯސްޓުން އާ ކޮށްދެއެވެ.
ޖަމްބޫގެ އާއިލާއިން ދިރިއުޅެމުން ދިޔަ ގޭގައި އެ ދިދަ ނެގީ މިދިޔަ ބުރާސްފަތި ދުވަހުއެވެ. މާ ގިނަ އިރުތަކެއް ނުވެ، އާންމުންގެ ސަމާލުކަމަށް އެ ދިދަ އަރައިފިއެވެ. ދިދަ ފެނުނު މީހުން، ޖަމްބޫގެ ވާހަކަ، އަވަށު ކޮމިޓީއަށް އެންގިއެވެ.
"ކޮމިޓީގެ ޗެއާމަން، ބައްޕައަށް ފައިސާ ހުށަހެޅި. އެކަމަކު، ބައްޕަ ބޭނުން ވެފައި ހުރީ ކާބޯތަކެތި" ޖަމްބޫގެ އަންހެން ދަރިފުޅު، ވާނީ ބުންޏެވެ.
ކަނބުރުގެއެއްގެ ސެކިއުރުޓީ ގާޑެއްގެ ގޮތުގައި މަސައްކަތް ކުރަމުން ދިޔަ ޖަމްބޫއަށް މީގެ ކުރިން، މަހެއްގެ މައްޗަށް، 312 ޑޮލަރުގެ އާމްދަނީއެއް ލިބެއެވެ. އެ ފައިސާ ކޮޅުގެ ތެރެއަށް، ދަރިންގެފަރާތުން ކުޑަ އެހީއެއް އިތުރު ކޮށްގެން، ޖަމްބޫގެ އާއިލާއަށް ޒަރޫރީ ކާބޯތަކެއްޗާއި، ގޭގެ ކުލި އަދި އަނބިމީހާގެ ފޭސް ފަރުވާގެ ކަންކަން ކިރިއާ ހަމަޖައްސާލެވެނީއެވެ.
ކޮވިޑް-19 ކޮންޓްރޯލް ކުރުމަށް މެލޭޝިއާގައި ސިލްސިލާ ގޮތެއްގައި ތަންފީޒު ކުރަމުން ދާ މޫވްމަންޓް ކޮންޓްރޯލް އޯޑާ (އެމްސީއޯ) ވީ، ޖަމްބޫގެ އާމްދަނީއަށް އެޅުނު ހުރަހަކަށެވެ.
އާމްދަނީއަށް ހުރަސް އެޅުނު ފަރާތްތަކަށް މެލޭޝިއާ ސަރުކާރުން ފޯރުކޮށްދިން 500 ރިންގިޓްގެ އެހީ ލިބުނެވެ. ނަމަވެސް 450 ރިންގިޓު ދޭން ޖެހެނީ ކުއްޔަށެވެ.
ވާނީއަށްވެސް އޭނާގެ ބައްޕައަށް ފައިސާގެ އެހީ ދެވޭ ގޮތެއް ނުވިއެވެ. ކޮވިޑްގެ ތެރޭގައި އޭނާގެ މާލީ ތަނަވަސްކަމަށްވެސް ހުރަސް އެޅުނެވެ. ވާނީއަކީ ކަރަންޓް މަސައްކަތް ކުރާ ވިޔަފާރިއެއް ހިންގާ ޒުވާނެކެވެ. ނަމަވެސް، އެއީ ޒަރޫރީ ވިޔަފާރިއެއް ނޫން ކަމުން، އެމްސީއޯގެ ތެރޭގައި، އެ ވިޔަފާރި ހިންގާކަށް ހުއްދައެއް ނުލިބުނެވެ.
ޖަމްބޫ ގަބޫލު ކޮށްގެން ހުރީ، އަހަރެއްހާ ދުވަހުގެ ތެރޭގައި ތަކުލީފުތަކަށް ލުއި ލިބިދާނެ ކަމަކަށެވެ. ނަމަވެސް، އޭނާ ބުނާ ގޮތުގައި، ހާލަތު ދަނީ ގޯހުން ގޯހަށެވެ.
މިއީ ޖަމްބޫގެ އެކަނި ހާލެއް ނޫނެވެ. މިފަދަ ކިތަންމެ އާއިލާއެއް، އަދި މިއަށްވުރެ ދަތި ހާލުގައި، މެލޭޝިއާގައި ދިރިއުޅެމުން އެބަދެއެވެ. މިފަދަ އާއިލާތަކަށް އެހީވުމަށް އެންމެ ފުރަތަމަ އިސް ނެގި އެކަކީ، އިޖުތިމާއީ އަދި ސިޔާސީ އެކްޓިވިސްޓް، ނީކް ފާއިޒާ ނީކް އުސްމާންއެވެ. ހާލުގައި ޖެހިފައިވާ ގޭބިސީތަކުން ހުދު ދިދައެއް ވިހުރުމަށް ހުށަހެޅީ އޭނާއެވެ.
ފައިޒާ ބުނި ގޮތުގައި، އެކަމުގެ ސަބަބަކަށް ވީ ކޮވިޑްގައި ހާލުގައި ޖެހި އަމިއްލައަށް މަރުވާ މީހުންގެ އަދަދު އިތުރުވަމުން ދިޔަ ދިއުން އާންމު ކަމަކަށް ވިޔަ ނުދިނުމެވެ.
މެލޭޝިއާ ފުލުހުންގެ ތަފާސް ހިސާބުތަކަށް ބަލާއިރު ޖެނުއަރީ މަހާއި މެއި މަހާ ދެމެދު، އަމިއްލައަށް މަރުވުމުގެ 468 ކޭހެއް ވަނީ ރިޕޯޓް ކޮށްފައެވެ. މީގެ ތެރެއިން 117 ކޭހަކީ ސެލަންގޯއިން ރިޕޯޓް ކޮށްފައިވާ ކޭސްތަކެވެ. މައިގަނޑު މައްސަލައެއް ކަމަށް ވެފައި އޮންނަނީ އާއިލީ މައްސަލަތަކެވެ. ޖަޒުބާތީ މައްސަލަތަކުގެ އިތުރުން، މާލީ ފިއްތުންތައް ކަމަށް މެލޭޝިއާޣެ ކްރިމިނަލް އިންސްވެޓިގޭޝަން ޑިޕާޓްމަންޓްގެ ޑައިރެކްޓާ، ޢަބްދުޖަލީލު ހަސަން ވިދާޅުވިއެވެ.
ޖަމްބޫމެން ފަދަ އާއިލާތަކުން ހުދު ދިދަ ނަގައިގެން އެހީ ކަށަވަރު ކުރި ކަމުގައި ވި ނަމަވެސް، މިކަން މިހެން ނުދެކޭ ބަޔަކުވެސް މެލޭޝިއާގައި އެބަ އުޅެއެވެ. އެމީހުން ގަބޫލު ކުރާ ގޮތުގައި ހުދު ދިދަ ނެގުމަކީ، ނާކާމިޔާބުވުމެވެ. ސަބަބަކަށް ވަނީ، ބައެއް ސަރަހައްދުތަކުން، މި ދިދައަށް މާ ބޮޑު ސަމާލުކަމެއް ނުދިނުމެވެ. އެހީގެ އަތެއް ދިއްކޮށް ނުލުމެވެ. އެފަދަ ސަރަހައްދުތަކުގެ އޮފިޝަލުން ވިދާޅުވާ ގޮތުގައި، އެހީ ބޭނުން ފަރާތްތަކުން، އެކަމަށް އެދި، ރަސްމީކޮށް ހުށަހަޅަން ޖެހެއެވެ.
