ރައްޔިތުންގެ މަޖިލީހާ ގުޅޭގޮތުން ރައްޔިތުން ކުރަން ބޭނުންވާ ސުވާލުތަކަށް ޖަވާބު ދެއްވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ބާއްވަވާ "އާސްކް ސްޕީކާ" ޕްރޮގްރާމްގެ ތިންވަނަ ޕްރޮގްރާމް ޖުލައި މަހުގެ 5ވަނަ ދުވަހު ބޭއްވުމަށް ނިންމާފިއެވެ.
މަޖިލީހުން ބުނީ ޓީވީއާއި ސޯޝަލް މީޑިއާ މެދުވެރިކޮށް، ރައްޔިތުންގެ ސުވާލުތަކަށް ޖަވާބު ދިނުމަށް ބާއްވާ، "އާސްކް ސްޕީކާ"ޕްރޮގްރާމް އޮންނާނީ ޖުލައި 5، 2021 ވާ ހޯމަ ދުވަހުގެ ރޭގަނޑު 9:00 ގައި ކަމަށެވެ.
އެގޮތުން މި ފަހަރުގެ ޕްރޮގްރާމް ކުރިއަށް ގެންދިއުމަށް ހަމަޖައްސާފަވަނީ ވާޗުއަލް ކޮށް ކަމަށާއި ކަލަބް ހައުސް މެދުވެރިކޮށް ލައިވްކޮށް ސުވާލު ކުރުމުގެ ފުރުސަތުވެސް ލިބޭނެ ކަމަށް މަޖިލީހުން ބުނެއެވެ.
މަޖިލީހުން ބުނީ ޕްރޮގްރާމް ޓީވީ ޗެނަލްތަކުންނާއި ސޯޝަލް މީޑިއާގެ ވަސީލަތްތަކުން ވަގުތުން ފެންނާނެ ކަމަށެވެ.
އެޕްރޮގްރާމުގައި ރައްޔިތުންގެ ސުވާލުތަކަށް ރައްޔިތުންގެ މަޖިލީހުގެ ރައީސް ވަގުތުން ޖަވާބު ދެއްވާއިރު ރައްޔިތުންގެ މަޖިލީހުގެ ރައީސާ ސުވާލުކުރަން ބޭނުންވާ ފަރާތްތަކުން، ސުވާލު ފޮނުއްވުމުގެ ފުރުސަތު ހުޅުވާލާފައިވާ ކަމަށް މަޖިލީހުން ބުނެއެވެ.
އެގޮތުން ސުވާލު ފޯނުން ވީޑިއޯ ކުރުމަށްފަހު ފޮނުއްވައިގެން ނުވަތަ މެސެޖު މެދުވެރިކޮށް ސުވާލުކުރެއްވޭނެ ގޮތް ހަމަޖެހިފައިވާ ކަމަށް މަޖިލީހުން ބުނެއެވެ. އަދި ޕްރޮގްރާމުގައި ލައިވްކޮށް ސުވާލުކުރުމަށް ބޭނުންވާ ފަރާތްތަކުން ނަން ނޯޓުކުރުގެ ފުރުސަތު ހުޅުވާލާފައިވާ ކަމަށް މަޖިލީހުން ބުނެއެވެ.
ސުވާލުކުރާ ފަރާތުގެ ނަމާއި ކުރަންން ބޭނުންވާ ސުވާލު ފޮނުއްވާނީ ޖުލައި 5 ވާ ހޯމަދުވަހުގެ މެންދުރު 2:00 ގެ ކުރިން ރައްޔިތުންގެ މަޖިލީހުގެ އިދާރާގެ މީޑިއާ ސެކްޝަންގެ ހޮޓްލައިން ނަންބަރު 7234566 އަށް ކަމަށް މަޖިލީހުން ބުނެއެވެ.
އޭގެ އިތުރުން، ކްލަބްހައުސް މެދުވެރިކޮށް ސުވާލުކުރަން ބޭނުންވާ ފަރާތްތަކުން އެ ފަރާތެއްގެ ނަން އަދި ކްލަބް ހައުސް އެކައުންޓުގެ ނަން މީޑިއާ ސެކްޝަންގެ ހޮޓްލައިން ނަންބަރަށް ފޮނުވުމަށް މަޖިލީހުން ވަނީ އެދިފައެވެ.
އަދި ސޯޝަލް މީޑިއާ މެދުވެރިކޮށް ސުވާލުކުރަން ބޭނުންވާ ފަރާތްތައް، ސުވާލު ޕޯސްޓު ކުރާއިރު AskSpeaker# ބޭނުންކުރުމަށް މަޖިލީހުން ވަނީ އެދިފައެވެ.
މަޖިލީހުން ބުނީ "އާސްކްސްޕީކާ" ޕްރޮގްރާމަކީ ރައްޔިތުންގެ މަޖިލީހުގެ އިދާރާއިން ކުރިއަށް ގެންދާ ލައިވް ޕްރޮގްރާމެއް ކަމަށެވެ.
