ކޮމިއުނިސްޓް ޗައިނާގެ އާބާދީގެ ނިސްބަތުން ބައިމަދު ނަސްލުތަކާ ދަރިކޮޅުތަކުގެ މީހުންނަށް އަމާޒުކޮށްގެން، 'އޯގަން ހާވެސްޓިންގް' ނުވަތަ މަޖުބޫރުން ގުނަވަންތައް އަތުލާ، ނެގުމުގެ ޖަރީމާ ހިންގަމުން އަންނަ ކަން ހާމަކޮށް، އދގެ ތަޖުރިބާކާރުންގެ ޓީމަކުން ކަންބޮޑުވުން ފާޅު ކޮށްފިއެވެ.
މުސްލިމުންނާ ނަސޯރާއިންވެސް ހިމެނޭހެން، އާބާދީގެ ނިސްބަތުން ބައިމަދު ނަސްލުތަކުގެ މީހުންގެ ގުނަވަންތައް ނެގުމުގެ ޖަރީމާ ހިންގާ ކަމުގެ ސައްހަ މައުލޫމާތު ލިބިފައި ވާ ކަމަށް، ތަޖުރިބާކާރުންގެ ޓީމުން ބުނެއެވެ. ޝިކާރައަކަށް ވާ މީހުންގެ ތެރޭގައި، ލާއިންސާނީ އެތައް އަނިޔާއެއް ތަހައްމަލު ކުރާ، ވީގޫރު ދަރިކޮޅުގެ މުސްލިމުންވެސް ހިމެނެއެވެ.
އެގޮތުން ނަސްލީ، ބަހުރުވަ ނުވަތަ ދީނުގެ ގޮތުން ބައިމަދު މީސްތަކުންގެ ތެރެއިން ޗައިނާގެ ކަމާ ބެހޭ ފަރާތްތަކުން ހައްޔަރުކޮށްގެން ގެންގުޅޭ މީހުންނަށް ލޭގެ ޓެސްޓުތައް ހަދަން މަޖުބޫރު ކުރުވާ ކަމަށާ، އަދި އެމީހުންގެ އެތެރެ ހަށީގެ ގުނަވަންތައް ޓެސްޓު ކުރުމަށް އެކްސް-ރޭ އަދި އަލްޓްރާ ސައުންޑް ސްކޭންތައް، އެ ގައިދީންގެ ހުއްދަ ނެތި ހަދަމުން އަންނަ ކަމަށްވެއެވެ.
ކަން މިހެން އޮތް އިރު، އެހެން ގައިދީންނަށް އެކަން ކުރަން ނުޖެހޭ ކަމަށްވެސް މައުލޫމާތު ލިބެއެވެ.
މި ޓެސްޓުތަކުން ލިބޭ ނަތީޖާއަކީ، ގުނަވަން ދޭނެ، ދިރިހުރި މަސްދަރުތަކުގެ ޑޭޓާ ބޭސްއެއްގައި ރައްކާ ކުރާ މައުލޫމާތު ކަމަށް ހަބަރު ލިބެއެވެ.
ލިބިފައިވާ ތުހުމަތުގެ މައުލޫމާތުތަކަށް ބަލާއިރު، އެންމެ ގިނަ އަދަދަކަށް ނަގާފައި ވާ ގުނަވަންތަކަކީ، ހިތް، ކިޑްނީ އަދި ފުރަމެއާ ލޮލުގެ ބައެއް ހިމެނެއެވެ. ސިއްހީ ކަންކަމާ ގުޅޭ މިފަދަ ވަގުފާރީގެ އަސްލަށް ބަލާއިރު، ސިއްހީ ދާއިރާގެ ތަޖުރިބާކާރުން ބައިވެރިވާ ކަމަށް ތުހުމަތު ކުރެވެއެވެ. އޭގެ ތެރޭގައި އޮޕަރޭޝަން ޑޮކްޓަރުންނާ، ހޭ ނައްތާ ޑޮކްޓަރުންގެ އިތުރުން، އަދިވެސް އިތުރު ސިއްހީ ސްޕެޝަލިސްޓުން ހިމެނެއެވެ.
މަޖުބޫރުން ގުނަވަން ނެގުމުގެ ސަބަބުން މަރުވާ ގައިދީންނާ މެދުވެސް ޗައިނާއިން އަމަލު ކުރަނީ އިހާނެތި ގޮތަކަށް ކަން، އދގެ ތަޖުރިބާކާރުންގެ ޓީމުން ފާހަގަ ކުރެއެވެ. އެގޮތުން، ގައިދީންގެ ހަށިގަނޑުތައް އާއިލާއަށް ނުލިބޭ ކަމުގެ މައްސަލަ ވަނީ ފެންމަތިވެފައެވެ.
ތަޖުރިބާކާރުން ވަނީ، މި ތުހުމަތުތަކަށް ޗައިނާއިން ޖަވާބުދާރީ ވުމަށާ، އިންސާނީ ހައްގުތަކުގެ ބައިނަލްއަގުވާމީ ނިޒާމެއްގެ ތެރެއިން މަސްރަހު ވިލަރެސް ކުރުމުގެ ފުރުސަތު ފަހިކޮށްދިނުމަށް، ޗައިނާއަށް ގޮވާލާފައެވެ.
އދގެ ތަޖުރިބާކާރުންގެ ޓީމުގައި، ދިވެހިރާއްޖޭގެ ކުރީގެ ފޮރިން މިނިސްޓަރު އަދި އދގެ ސްޕެޝަލް ރެޕަޓުއާ އޮން ފްރީޑަމް އޮފް ރިލިޖަން އޯ ބިލީފް، ޑރ އަހުމަދު ޝަހީދުވެސް ހިމެނިވަޑައިގަންނަވައެވެ.
2006 ވަނަ އަހަރާއި 2007 ވަނަ އަހަރުވެސް އދގެ ތަޖުރިބާކާރުންގެ ޓީމުން ވަނީ ޗައިނާގެ ސަރުކާރާ މި މައްސަލަ ހިއްސާ ކޮށްފައެވެ. ނަމަވެސް އެކަށީގެންވާ މައުލޫމާތު ނެތުމުގެ ސަބަބުން، މައްސަލަ އޮތީ ކުރިއަށް ދާ ގޮތް ނުވެފައެވެ. މަޖުބޫރުން ގުނަވަންތައް ނަގައިގެން، އެ ގުނަވަންތައް ވަގުފާރީގައި ބޭނުން ކުރަމުން ދާ ކަމުގެ ތުހުމަތުތަކަށް ޗައިނާގެ ހުދުމުހުތާރު ސަރުކާރުން އިންކާރު ކުރެއެވެ.
