ބާރު ސްޕީޑުގައި ދުއްވާފައި ދިޔަ ސައިކަލަކުން ގާޑިޔަލެއްގައި ޖެހި ރޭ އެކްސިޑެންޓް ވުމާއެކު ސައިކަލް ދުއްވަން އިން މީހާ ފިލި ފަހުން އަދިވެސް ނުފެންނަ ކަމަަށް ފުލުހުން ބުނެއެވެ.
ރޭ އެކްސިޑެންޓް ހިނގާފައި ވަނީ 10 ޖަހާކަންހާއިރު ހުވަފެނީ ގޯޅީގައި ބާއްވާފައި އޮތް ގާޑިޔަލެއްގައި ޖެހިގެންނެވެ. އެ އެކްސިޑެންޓުގައި ސައިކަލް ފަހަތުގައި އިން ޒުވާނާ މަރުވެފައި ވާއިރު ސައިކަލު ދުއްވަން އިން މީހާ އެކްސިޑެންޓް ވުމާއެކު ފިލާފައި ވާކަމަށް ގަބޫލު ކުރެވޭ ފުލުހުން ރޭ ވަނީ ބުނެފައެވެ.
އެކަމާ ގުޅިގެން "ދަ ޕްރެސް" އަށް މައުލޫމާތު ދެމުން ފުލުހުންގެ މީޑިއާ އޮފިޝަލް ވިދާޅުވީ އަދިވެސް ސައިކަލް ދުއްވަން އިން މީހާ ނުފެންނަ ކަމަށެވެ.
މި އެކްސިޑެންޓުގައި މަރުވީ އުމުރުން 22 އަހަރުގެ އިސްމާއިލް ޔަޒްދާން އަލީ އެވެ.
މި އެކްސިޑެންޓު ހިނގިތާ ކުޑައިރުކޮޅެއްގެ ތެރޭގައި ނަގާފައިވާ ވީޑިއޯއެއް ސޯޝަލް މީޑިއާގައި ވަނީ ދައުރުވެފައެވެ. އެވީޑިއޯ އިން ފެންނަ ގޮތުގައި އެ ގޯޅީގެ އެއް ފަރާތުގައި ފެހި ކުލާގެ ގާޑިޔާއެއް އޮތެވެ. އަދި މަގުމެދުގައި ދެ ސައިކަލެއް ވެއްޓިފައި އޮތްއިރު އެ ސަރަހައްދަށް މީހުން އެއްވިއެވެ.
ވީޑިއޯއިން ފެންނަ ގޮތުގައި އެކްސިޑެންޓުވި ޔަޒްދާން ބިންމަތިން ތެދުވެ، ކުޑަތަންކޮޅަކަށް ހިނގާލި ތަނާ، އޭނާގެ ކަރަށް ލިބިފައިވާ އަނިޔާ މީހުންނަށް ފެނި ހަޅޭއްލަވައިގަތް އަޑު އިވެއެވެ. އަދި އެތާ ތިބި މީހުން އޭނާ ކައިރީ އަވަހަށް އިށީނުމަށް ބުނަމުން ދިޔައެވެ. ޔަޒްދާން އިށީނުމަށް މަސައްކުރަނިކޮށް ފެނިގެން ދިޔައީ ކުއްލިއަކަށް އޭނާ ވެއްޓުނު މަންޒަރެވެ.
ޔަޒްދާން ވެއްޓުމުން، އެ ސަރަހައްދުގައި ހުރި މީހަކު ޓީޝާޓް ބާލަާ، އޭނާގެ ކަރުގައި އޮޅާލައެވެ. އެއްވެތިބި ބައެއް މީހުން އެމްބިއުލާންސަށް ގުޅާށޭ ގޮވާ އަޑު ވެސް އިވެއެވެ.
ޔަޒްދާން މަރުވެފައި ވަނީ އޭޑީކޭއަށް ގެންގޮސް ފަރުވާ ދެމުން ދަނިކޮށެވެ.
