މާލޭ ސިޓީގެ މޭޔާރު ޑރ. މުހައްމަދު މުއިއްޒު ރައީސް އިބްރާހީމް މުހައްމަދު ސޯލިހާއި ބައްދަލުކުރައްވައިފިއެވެ.
މޭޔަރު މުއިއްޒު ރައީސްއާ ބައްދަލުކުރައްވާފައިވަނީ މާލޭ ރައްޔިތުންގެ ކަންބޮޑުވުންތައް ހިއްސާކުރުމަށާ، މަސައްކަތްތައް ތަންފީޒުކުރުމުގައި ބޭނުންވާ އެހީތެރިކަމާ މެދު މަޝްވަރާ ކުރުމަށެވެ. މިބައްދަލުކުރެއްވުމަށް ފަހު ކުރެއްވި ޓުވީޓެއްގައި މުއިއްޒު ވިދާޅުވެފައިވަނީ ރައީސް ސޯލިހާއެކު ބިނާކުރަނިވި އުންމީދީ ބައްދަލުވުމެއް ބޭއްވިފައިވާނެ ކަމަށާ، ރައީސް ދެއްވި ވަގުތަށާއި އުންމީދީ ޖަވާބުތަކަށް ޝުކުރު ދަންނަވާކަމަށެވެ.
މި ބައްދަލުވުމުގައި ބޮޑަށް މަޝްވަރާކުރެވިފައިވަނީ ހިޔާ ފްލެޓްގެ ކުއްޔާ ގުޅޭގޮތުންނާ ގުޅީފަޅުގައި ހިންގާ ބަނދަރު އެޅުމުގެ މަޝްރޫއާ ގުޅޭގޮތުންނެވެ.
މޭޔާ މުއިއްޒު ފާހަގަކުރެވިގެންދަނީ މަގާމާ ހަވާލުވީއްސުރެ މަގާމުގެ މަސްއޫލިއްޔަތު އެންމެ ފުރިހަމަ ގޮތުގައި އަދާކުރަމުންދާ އެއް ބޭފުޅެއްގެ ގޮތުގައެވެ. އެގޮތުން މާލޭގެ ރައްޔިތުންނާ މާލޭގައި ދިރިއުޅޭ ރައްޔިތުންނަށް އެކި ކަންކަމުގައި ހައްލު ހޯދައިދޭން މަސައްކަތްކުރުން ހިމެނެއެވެ.
