ރައީސުލްޖުމްހޫރިއްޔާގެ އޮފީހުގެ ފޮރިން ރިލޭޝަންސް އޮފީހުގެ ސެކްރެޓަރީގެ މަގާމުގައި ހުންނެވި ސަބްރާ އިބްރާހީމް ނޫރައްދީނާއި، ރައީސުލްޖުމްހޫރިއްޔާގެ އޮފީހުގެ ނޭޝަނަލް ސެކިއުރިޓީ އެޑްވައިޒާސް އޮފީހުގެ ސެކްރެޓެރީގެ މަގާމުގައި ހުންނެވި އާއިޝަތު ނޫޝީން ވަހީދު ވަޒީފާއަށް އައްޔަނު ކޮށްފައި ވާނީ ގަވާއިދުން ބަލަންޖެހޭ އެންމެހައި ކަންކަމާ ކުށުގެ ރެކޯޑުވެސް ސާފުކޮށްފައި ކަމަށް ރައީސް އޮފީހުން ބުނެފިއެވެ.
ރައީސް އޮފީހުން ބުނެފައި ވަނީ އެ އޮފީހުގެ ވަޒީފާއަށް މީހަކު ހަމަޖެއްސުމުގެ ކުރިން އެމީހަކާބެހޭ ގޮތުން ސާފުކުރަންޖެހޭ މައުލޫމާތާއި ކުށުގެ ރެކޯޑް ކަނޑައެޅިފައިވާ އުސޫލުން ބަލައި ސާފުކުރާ ކަމަށެވެ.
ރައީސް އޮފީހުން މިގޮތަށް ބުނެފައިވަނީ "ރައީސް އޮފީހުން ކުރާ އިންޓެލިޖެންސް އޮޑިޓުގައި ކަންބޮޑުވާންނޖެހޭ އެތައް ކަމެއް!" މިނަމުގައި "ދިޔަރެސް" ނޫހުން ޝާއިއު ކޮށްފައި ވާ ރިޕޯޓު ގައި ހަގީގަތާ ހިލާފު ދޮގު މައުލޫމާތު ހިމަނައިފައި ވާ ކަމަށް ބުނެއެވެ.
ރައީސް އޮފީހުން ބުނެފައި ވަނީ ރާއްޖޭގައި އިންޓެލިޖެންސްގެ މަސައްކަތް މިހާރެކޭ އެއްފަދައިން އަދި ކުރިޔަށް އޮތް ދުވަސްތަކުގައިވެސް ކުރާނީ ފުލުހުންނާއި ސިފައިންގެ އިތުރުން މިހާރުވެސް އެކަން ކުރަމުންދާ އިދާރާތަކުން ކަމަށެވެ.
