ބޭރުތޮށި ހަޑިކޮށް ހުންނަ ބިސް ރާއްޖެއަށް އެތެރެކޮށް ވިއްކުމަކީ މަނާކަމެއް ކަމަށް ހެލްތު މިނިސްޓްރީން ބުނެފިއެވެ.
ދިވެހިރާއްޖެއަށް އިންޕޯޓުކޮށް ވިއްކާ ކުކުޅު ބިހާއިގުޅޭ ގޮތުން މިނިސްޓްރީން ކުރި އިއުލާނެއްގައި ބުނީ މުއްދަތު އިތުރުކުރުމަށް ހާއްސަ ޓްރީޓްމަންޓްއެއް ނުދީ ފިނިނުކޮށް ކުކުޅު ބިސް ބަހައްޓަންވާނީ އުފެއްދި ތާރީހުން ފެށިގެން އެންމެ ގިނަވެގެން 28 ދުވަހުގެ މުއްދަތަށް ކަމަށެވެ. އަދި ޓްރީޓްމަންޓްއެއް ނުދީ ފިނިކޮށް (5°C އަށްވުރެ ދަށުގައި) ބަހައްޓަންވާނީ އުފެއްދި ތާރީހު ފެށިގެން އެންމެ ދިގުވެގެން ތިން މަސްދުވަހުގެ މުއްދަތަށް ކަމަށް ވެސް މިނިސްޓްރީން ބުނެއެވެ.
މިނިސްޓްރީން ބުނީ އެގޮތަށް އިންޕޯޓްކޮށް ވިއްކާ ކުކުޅުބިސް އިންޕޯޓްކޮށް ވިއްކުމުގެ ހުރިހާ މަރުހަލާއެއްގައި އޭގެ ފިނިހޫނުމިން ހިފެހެއްޓިފާ ހުންނަންވާނެ ކަމަށެވެ.
އަދި ބިހުގެ މުއްދަތު ހަމަވާ ތާރީހް ތިން މަސް ދުވަހަށްވުރެ އިތުރުވާނަމަ މުއްދަތު އިތުރު ކުރުމަށްޓަކައި ދީފައިވާ ޓްރީޓްމަންޓް ބަޔާންކޮށް އުފެއްދި ފަރާތުން (މެނުފެކްޗަރާ) ނުވަތަ އުފެއްދި ގައުމު (ކަންޓްރީ އޮފް އޮރިޖިން)ގެ ކަމާ ބެހޭ ފަރާތުގެ ލިޔުމެއް ހުށަހަޅަންވާނެ ކަމަށް ވެސް މިނިސްޓްރީން ވަނީ ބުނެފައެވެ.
އޭގެ އިތުރުން ބޭރުތޮށި ނުސާފުކޮށް އަދި ނަޖިސް ހަރުލާފައި ހުންނަ ބިސް ރާއްޖެއަށް އެތެރެކޮށް ވިއްކުމަކީ މަނާ ކަމެއް ކަމަށާއި ރާއްޖެއަށް އިންޕޯޓުކުރާ ބިހާއި ބިހުގެ ބާވަތްތަކަށް ހެލްތު ކްލިއަރެންސް ދޫކުރާނީ ހެލްތު ސެޓްފިކްޓްގެ އޮރިޖިނަލް ހުށަހެޅުމުން ކަމަށް ވެސް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ ހެލްތު ސެޓްފިކެޓްގައި މުދާ އުފެއްދި ގައުމު (ކަންޓްރީ އޮފް އޮރިޖިން) ބަޔާންކޮށްފާ ނެތްނަމަ ސެޓްފިކެޓް އޮފް އޮރިޖިން ހުށަހަޅަންވާނެ ކަމަށެވެ.
އެއްވެސް ސަބަބަކާއި ހުރެ ސެޓްފިކެޓްގެ އޮރިޖިނަލް ވަގުތަށް ހުށަނޭޅިއްޖެ ހާލަތެއްގައި އެ ސެޓްފިކެޓެއް ދޫކުރި އޮތޯރިޓީން އެ އޮތޯރިޓީއަށް މެއިލް މެދުވެރިކޮށް ހުށަހެޅުމުން ގަބޫލުކުރެވޭނެ ކަމަށް މިނިސްޓްރީން ބުނެއެވެ. އަދި ރާއްޖެއަށް އެތެރެކޮށް ވިއްކާ ބިހާއި ބިހުގެ ބާވަތްތައް ހުންނަންވާނީ އެ އޮތޯރިޓީގެ މިންގަޑު "ބަންދުކުރި ކާބޯތަކެތި ލޭބަލްކުރުމުގެ ގައުމީ މިންގަނޑާ އެއްގޮތަށް ލޭބަލް ކޮށްފާ ކަމަށް ވެސް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ ފިހާރަތަކުގައި ވިއްކަން ހުންނަންވާނީ މުއްދަތު ހަމަވާ ތާރީހް ގަންނަ ފަރާތަށް އެނގޭނެގޮތަކަށް ކަމަށެވެ.
ޔެލޯ ކުދިން އެޅި ބިސް . ޢެހެންވެ ތި ހުރީ ނަޖިސް.