ތަފާތު އެކި ސަބަބުތަކާ ހެދި އޮފީހަށް ނިކުތުމަށް އުޒުރުވެރި ސަލާމް ބުނުމަކީ، އަދުގެ ވަޒީފާގެ ބާޒާރުގައި ގިނަ ބައެއްގެ ކަށީގައި ހަރުލާފައި ވާ ކަމަށް ވަނީ ވެފައެވެ. ކޮންމެ މީހަކަށްވެސް ގާނޫނުން ހައްގުވާ ވަކި އަދަދެއްގެ ސަލާމް ޗުއްޓީތަކެއް ހުންނައިރު، މިކަމުގެ ނާޖައިޒު ފައިދާ ނަގާ މީހުންގެ އަދަދުވެސް މަދެއް ނޫނެވެ. ނަމަވެސް، އެމީހެއްގެ ވާހަކަ، މިތަނުގައި ބަޔާން ކުރަން މިއުޅޭ މީހަކީ، އޮފީހަށް ހާޒިރުނުވުމުގެ އާ ރެކޯޑެއް މުގުރާލި މީހެކެވެ.

އެމީހަކު ހުރީ އިޓަލީވިލާތުގައެވެ. އިޓަލީވިލާތުގެ މީޑިއާތަކުން އެމީހަކަށް ރިއާޔަތް ކުރަނީ "ހާޒިރުނުވާ މީހުންގެ ރަސްގެފާނު" ގެ ނަމުންނެވެ. ބުނެވޭ ގޮތުގައި، އެމީހާ ވަޒީފާއަށް ނުނިކުމެ، މުސާރަ ނަގާތާ މިހާރު 15 އަހަރުވެއްޖެއެވެ.

އިޓަލީވިލާތުގެ ފުލުހުން ބުނާ ގޮތުގައި، މިހާރު އުމުރުން 67 އަހަރު ފުރިފައިވާ މި މީހާ، މަހު މުސާރައިގެ ގޮތުގައި ގާތްގަނޑަކަށް 645000 ޑޮލަރު ނަގާފައިވެއެވެ. ނަމަވެސް، 2005 ވަނަ އަހަރަށްފަހު، އެންމެ ދުވަހަކުވެސް އޭނާ މަސައްކަތަށް ހާޒިރުވެފައެއް ނުވެއެވެ.

"ހާޒިރުނުވާ މީހުންގެ ރަސްގެފާނު"، ވަޒީފާ "އަދާކުރަނީ" ކަތަންޒާރޯ ސިޓީގެ ޕިލިއޭޒެ ޗާއްޗޯ ހޮސްޕިޓަލުގައެވެ. އޭނާއާ ދެކޮޅަށް އެކި ދައުވާތަކެއް އުފުލާފައި ވާއިރު، އޭގެ ތެރޭގައި ލިޔެކިއުންތައް އޮޅުވާލުން ނުވަތަ ފޯޖް ކުރުމުގެ ދައުވާއާ، އޮފީހުގެ ނާޖާއިޒު ފައިދާ ނެގުމުގެ ދައުވާ ހިމެނެއެވެ.

ވަޒީފާއަށް ހާޒިރު ނުވުމުގެ މި މައްސަލާގައި، 6 މެނޭޖަރަކުވެސް ރާޑަރަށް އަރާފައި ވާކަމަށް މައުލޫމާތު ލިބެއެވެ.

"ޕާޓްޓައިމް" ނަމުން ވަނަން ދީގެން އިޓަލީވިލާތުގެ ފުލުހުން ކުރިއަށް ގެންދިޔަ ތަހުގީގުގައި، މުސާރައާ ހާޒިރީ ރެކޯޑްތަކުގެ އިތުރުން، އެތަނުގައި މަސައްކަތް ކުރާ އިތުރު މުވައްޒަފުންގެ ބަޔާންތަކެއްވެސް ވަނީ ނަގާފައެވެ.

"ހާޒިރުނުވާ މީހުންގެ ރަސްގެފާނު" އޮފީހަށް ހާޒިރު ނުވެގެން، އޭނާއާ ދެކޮޅަށް އަހުލާގީ މައްސަލައެއް ފައިލް ކުރަން އުޅުމުން، 2005 ވަނަ އަހަރު ހޮސްޕިޓަލުގެ ޑައިރެކްޓަރު ކަމުގެ މަގާމުގައި ހުންނެވި އޮފިޝަލަކަށް، "ހާޒިރުނުވާ މީހުންގެ ރަސްގެފާނު" ބިރު ދެއްކި ކަމުގެ ތުހުމަތެއްވެސް ވަނީ ފެންމަތިވެފައެވެ.

"ހާޒިރުނުވާ މީހުންގެ ރަސްގެފާނު"ގެ ފަރާތުން ބިރު ދެއްކުން އަމާޒުވި ޑައިރެކްޓަރު ވަނީ، ފަހުން އެ މަގާމުން ރިޓާޔާ ކޮށްފައެވެ. އަދި އޭގެ ފަހުން އެ މަގާމާ ހަވާލުވި އޮފިޝަލު ނުވަތަ ހިއުމަން ރިސޯސަސް ޑިޕާޓްމަންޓްވެސް، "ހާޒިރުނުވާ މީހުންގެ ރަސްގެފާނު" ގެ ހާޒިރީ ޓްރެކް ކުރުމުގައި ވަނީ ފެއިލްވެފައެވެ.

ވަޒީފާއަށް ހާޒިރުނުވުމުގެ މައްސަލައަކީ، އިޓަލީވިލާތުގައި ބޮޑުވެފައިވާ މައްސަލައެކެވެ. މިކަން ހައްލު ކުރުމަށް އިޓަލީވިލާތުން 2016 ވަނަ އަހަރު ވަނީ ގާނޫނެއްވެސް ފާސްކޮށްފައެވެ. މި ގާނޫނުގެ ދަށުން، އޮފީހަށް ހާޒިރުނުވުމުގެ މައްސަލަތައް ތަހުގީގު ކުރުމުގެ ފުރުސަތު، އެ ގައުމުގެ ފުލުހުންނަށް ލިބިދެއެވެ.

ލައިފްސްޓައިލް ލުއި ހަބަރު